​​​​​​​Rêveberiya Xweser û MSD`ê li Washington û Moskovê hevdîtin pêk anîn

Nûnerên MSD û Rêveberiya Xweser bi şandeya Wezareta Karên Derve ya Rûsyayê ya bi serkêşiya Mikhail Bogdanov re li Moskovê civiyan. Li Washingtonê jî MSD bi rayedarên DYA’yê re civiya. Rayedarên DYA’yê desteka welatê xwe ji MSD û QSD`ê re ragihand.

Duh li ser malpera fermî ya Meclisa Sûriya Demokratîk (MSD) hate ragihandin ku li Moskov û Washingtonê 2 civîn li dar xistine.

Têkildarî hevdîtina yekemîn wiha hate daxuyandin: "Bi vexwendina fermî ya Wezareta Karên Derve ya Rûsyayê, şandeyeke MSD`ê û Rêveberiya Xweser a Bakur û Rojhilatê Sûriyê bi serkêşiya Îlham Ehmed, hevdîtin bi nûnerên Wezareta Karên Derve ya Rûsyayê bi serkêşiya Mikhail Bogdanov re, çêkir.”

Her wiha hate diyarkirin ku hevdîtin erênî bû û teqezî li ser çareseriya siyasî ya aloziya Sûriyê li gorî biryara 2254`an hate kirin û îşaret bi girîngiya beşdarbûna MSD`ê di çareseriya siyasî de hate kirin, her wiha binpêkirina serdestiya Sûriyê bi destê dewleta Tirk, hate nîqaşkirin.

Her wiha malperê ragihand ku hevdîtinek di navbera şandeya MSD`ê bi serkêşiya Îlham Ehmed û wezîrê karên derve yê Rûsyayê Sergey Lavrov de di îlona 2020`an de pêk hatibû.

‘KOŞKA SPÎ TEQEZÎ LI SER DESTEKA JI MSD Û QSD`Ê RE KIR`

Têkildarî hevdîtina li Washingtonê jî ev agahî hatin parvekirin: "Berpirsên Koşka Spî ji şandeya MSD`ê re teqezî li sozdariya rêveberiya serok Joe Biden bi hevalbendiya bi QSD`ê re û mayîna hêzên welatê wî li herêmê kir, heta ku DAIŞ û şaneyên wê bi temamî bi dawî bibin û dê destekê bidin aramiya li herêmê.”

Li gorî malperê hevdîtin roja înê li Koşka Spî li dar ketiye û şandeya MSD`ê bi nûnerên payebilind ên rêveberiya Dewletên Yekbûyî yên Amerîkayê (DYA) re li Koşka Spî hatine cem hev. Di hevdîtinê de piştgiriya DYA’yê ya ji bo MSD û QSD`ê hat piştrastkirin.

HEVDÎTINÊN BI ENDAMÊN PAYEBILIND ÊN KONGREYÊ RE

Her wiha hevdîtin bi endamên payebilind ên Kongreya Amerîkayê re hatin kirin. Li gorî malperê hevdîtin erênî derbas bûne û tê de desteka Washingtonê ya ji MSD`ê re hat teqezkirin û îşaret bi girîngiya xebatên QSD`ê di şerê li dijî terorê de hat kirin û her wiha hate piştrastkirin ku hevalbendiya wan dê dewam bike.

Şandeyeke MSD`ê ya bi serkêşiya Îlham Ehmed hefteya borî gihaştibû Washingtonê.

(bx)

ANHA


Mijarên Din