Li 5 navendan peyama 25ˊê Mijdarê: Em ji bo wekheviyê tê dikoşin

Li Heleb, Qamişlo, Kobanê, Reqa û Hesekê de bi munasebeta 25’ê Mijdarê Roja Têkoşîna li dijî Tundiya li ser Jinan meşên girseyî hatin lidarxistin. Di meşan de ji aliyê Platfoma Çalakiyên Hevbeş a Rêxistin û Tevgerên Jinan a Bakur û Rojhilatê Sûriyeyê ve hatin organîzekirin de bi hezaran jin û mêr, peyamên bilindkirina têkoşînê hatin dayîn.

HELEB

Bi pêşengiya nûnerên tevgerên jinan ên Helebê, endamên Hêzên Ewlekariya Hundirîn-Jin, bi sedan şêniyên taxên Şêxmeqsûd û Eşrefiyê yên Helebê meşek li dar xist.

Meşê ji pêşiya Hola Civînan a 8’ê Adarê ya li taxa Şêxmeqsûdê dest pê kir. Di meşê de wêneyên Rêber Abdullah Ocalan, alên Kongra Star û wêneyên şehîdên azadiyê hatin hildan, her wiha dirûşmên "Bêdengiyê bişikîne, teslîm nebe", "Bi felsefeya Jin, Jiyan, Azadî xwe biparêze", "Pergala dewletê jinan qetil dike" û "Na ji tundiya li ser jinan re.. Jin, Jiyan, Azadî" hatin vekirin.

Meş li herêma Cebanat veguherî mîtîngê û deqeyekê rêz hat girtin. Endama Koordînasyona Kongra Star a Helebê Rîhana Elo axivî û diyar kir ku têkoşîna ji bo azadiya jinan ji di serdema nûjen de ji aliyê xwişkên Merîbal ve hat destpêkirin û li Kurdistanê jî ku bi pêşengiya şehîdên azadiyê hate destpêkirin, dewam dike.

Rîhana Elo destnîşan kir ku civakên ku jin tê de ne azad bin, ew civak ne azad e. Her wiha binpêkirnên pergalên dewletê yên li dijî jinan, bi taybetî biryarên tund ên rejîma Îranê yên li ser jinên çalakvan şermezar kirin û siyasetên hikumeta veguhêz a Sûriyeyê ya dûrxistina jinan jî rexne kirin.

Ji rêveberên Yekitiya Jinên Ciwan Şems Elîeldîn jî got jinên bi ramanên Rêber Abdullah Ocalan bawer in dê li hemberî siyasetên pergalên baviksalar û hêzên kapîtalîst ên ku jinan asteng dikin û rola di civakê de tune dihesibînin, bisekinin.

Mîtîng bi berzkirina dirûşmên "Jin, Jiyan, Azadî" bi dawî bû.

QAMIŞLO

Meş li Çerxerêya Frina Sîna dest pê kir. Bi sedan jin û mêran ku ji Qamişlo, Tirbespiyê, Amûdê, Til Koçer, Çilaxa, Dêrik û Girkê Legê û Til Hemîsê tev lê bûn.

Di meşê de pankartên bi nivîsên "Jin jiyan e, jiyanê nekujin", "Bi hev re e dawî li tundiya li dijî jinan bînin", "Bedena me çeka me li dijî tundiyê ye", "Em hene..em xwediyên têkoşînê ne" hatin vekirin û bênavber dirûşmên "Jin, Jiyan, Azadî" û "Na ji tundiya li dijî jinan" hatin berzkirin.

Meş heta pêşiya Stadyûma Heysem Kiço dom kir û deqeyekê rêz hat girtin.

Berdevka Kongra Star Rihan Loqo axivî û  diyar kir ku 25’ê Mijdarê roja biryardariya avakirina hevjiyaneke azad e.

Rîhan Loqo di axaftina xwe de şehîdên azadiyê bi bîr anîn û soza domandina têkoşîna li hemberî feraseta baviksalar da.

Her wiha destnîşan kir ku berxwedan û têkoşîna jinan kevirê bingehîn ê bidestxistina mafên xwe ye.

Hevseroka Meclisa Rêveber a Kantona Cizirê Viviyan Beho jî destnîşan kir ku parastina jinan erk û berpirsyariyeke civakî ye.

Viviyan Beho bal kişand ser têkoşîna jinên Bakur û Rojhilatê Sûriyeyê û bi bîr xist ku jinên herêmê civakê bi rêve dibin û afrînerên guherînê ne.

Viviyanê di dewama axaftina xwe de anî ziman ku têkoşîna li dijî jinan ne dirûşmeke ji rêzê ye, lê belê ji bo avakirina civakeke ewle, bi rûmet ku jin tê de bi azadî di hemû qadan de cihê xwe bigire, erkekî rojane ye.

Di dawiyê de Koma Şehîd Yusra ya Tevgera Hîlala Zêrîn a Çanda Jinan şanoyeke li ser têkoşîna jinan a li hemberî tundiyê pêşkêş kir.

KOBANÊ

Kogra Star a kantona Firatê bi boneya 25’ê Mijdarê Roja Têkoşîna li dijî Tundiya li ser Jinan meşek li dar xist.

Di meşê de wêneyên Rêber Abdullah Ocalan û alên Kongra Star û yên Rêxistina Sara hatin hildan û dirûşmên "Jin Jiyan Azadî", "Berxwedan jiyan e", "Bê Serok jiyan nabe" berz kirin.

Meşê ji Qada Şehîd Egîd dest pê kir û heta Qada Jina Azad a Kobanê dewam kir. Li wir deqeyekê rêzgirtin hat girtin, dûre endama Koordînasyona Kongra Star a bajarê Şêranê Nadiya Hiso axivî û wiha got: "Em roja têkoşîna li dijî tundiya li ser jinan, li tevahî jinan pîroz dikin. Ev roj roja berxwedan û têkoşînê ye. Komkujiya li hemberî jinan, komkujiya li dijî civakê ye. Hişmendiya desthilatdar, ew zîhniyeta ku dixwaze mafên mirovan ji cîhanê rake, yekser êrişî jinan dike. Jin dixwazin jiyaneke aram û wekhev ava bikin. Jinan bi têkoşîn û berxwedana xwe li ser fikir û felsefeya Rêber Apo xwe bi rêxistin kir û bi hemû hêza xwe dijmin têk bir û ji hişmendiya desthilatdar re got na."

Nadiya Hiso anî ziman ku jin bi hebûn û xwebûna xwe bûn mîrasa civakê û got: "Jinan bi têkoşîn û berxwedana xwe dinya hejand. Em vê roja pîroz li Rêber Apo û tevahî jinan pîroz dikin."

Meş bi dirûşmên "Jin Jiyan Azadî", "Bê Serok jiyan nabe" bi dawî bû.

REQA

Li bajarê Reqayê jî bi beşdariya gireseyek mezin a jinên ji kantonên Reqa, Tebqa û Dêrazorê meşek girseyî hat lidarxistin. Meşa ku endamên saziyên sivîl, leşkerî, rêxistinên jinan, nûnerên Rêveberiya Xweser tev lê bûn ji Çerxerêya Panorama ya bajarê Reqayê dest pê kir û li Qada Jina Azad sekinî.

Li Qada Jina Azad deqeyekê rêz hat girtin. Berdevka Kombûna Jinan a Zenûbiya Xod El Îsa axivî û anî ziman ku ev roj xaleke girîng di têkoşîna jinên Sûriyeyî de ye.

Xod El Îsa bal kişand ser binpêkrinên ku li dijî jinên têne kir û got: "Nabe, êş û azarên jinan ji koçberî, revandin û binpêkirinên ku jinên Efrîn, Girê Spî û Serêkaniyê kişandine werin kişandin. Mafê her jinekê heye ku bi ewle û bi rûmet, mafê edalet û hesabpirsîna ji sûcdaran heye."

Xod El Îsa şervanên YPJ û QSD’ê silav kirin û rola wan a parastina jinan û herêmê vegot.

Xod El Îsa diyar kir ku eger rêz li maf û azadiyên jinan were girtin, dê Sûriye bibe welatekî ji bo her kesî û wiha pê de çû: "Avakiria Sûriyeyê nû bi naskirina tevahiya mafên jinan dest pê dike. Em daxwaza welatekî dikin ku mafan di destûrê de mîsoger bike û bi qanûnan tundiyê krîmînalize bike. Jin ne nîvê civakê tenê ye, lê bel dil, rih û mobile wan e. Îro em dimeşin û sibe em ê guherînê biafirînin."

Seroka Desteya Jinan a Rêveberiya Xweseriya Demokratîk a Herêma Bakur û Rojhilatê Sûriyeyê Edalet Umer jî axivî û li dijî tundiyê banga mezinkirina têkoşînê kir.

Çalakî bi berzkirina dirûşmên "Na ji tundiya li dijî jinan re" û "Jin, Jiyan, Azadî" bi dawî bû.

HESEKÊ

Li bajarê Hesekê jî bi pêşengiya Kongra Star meşeke girseyî bi dirûşma "Em bi hev re li dijî tundiyê civakeke demokratîk û komînal ava bikin" hat lidarxistin.

Bi sedan jinên ji Hesekê, Dirbêsiyê, Til Temir, Hol, Şedadê, Mergeda, koçberên kampên Serêkaniyê û Waşûkanî û koçberên ji bajarên Efrînê beşdarî meşê bûn.

Meşê li Çerxerêya Merşo ya taxa Til Hecer ber bi Qada Aştiyê ve dest pê kir. Di meşê de dirûşmên şermezarkirina tundiya li ser jinan hatin berzkirin û pankartên "Na ji tundiyê re", "Erê ji jiyanê re", "Dûrxistina jinan ji qada siyasetê bi xwe tundî ye" û "Jiyana komînal nimûneya bidawîkirina tundiyê ye" hatin vekirin.

Meş li Qada Aştiyê rawestiya û deqeyekê rêz hat girtin. Li vir endama Koordînasyona Kongra Star Gulistan Gulo ev boneyê tevahî jinên têkoşer silav kir û got: "Hîna li pêşiya me têkoşîneke dirêj heye."

Gulistan Gulo di dewama axaftina xwe de bal kişand ser zêdebûna tundiya li dijî jinên Sûriyeyî û got: "Li Sûriyeyê ji dema ku HTŞ’ê bû desthilat tundiya li ser jinan zêdetir bûye.  Me hêvî dikir ku hêviyên me bi cih werin, lê em têghiştin em li pêşberî siyaseteke li dijî mafên jinan e."

Gulistan Gulo îşaret bi ezmûna li Bakur û Rojhilatê Sûriyeyê kir û wiha pê de çû: "Em li Bakur û Rojhilatê Sûriyeyê em pêşeng in. Ev jî bi saya Rêber Abdullah Ocalan pêk hatiye ku rê li pêşiya me vekiriye. Em dev ji vê rêyê bernadin. Em ê qebûl nekin ku careke din mafên werin çewisandin."

Hevseroka Meclisa PYD’ê ya bajarê Hesekê Zehra Elî jî anî ziman ku tundiya li dijî jinan sûcek li dijî jinan û mirovahiyê bi taybet e. Zehara got, divê hesab ji kesên bêrêziyê li rûmeta jinan û rola wan di civakê de dikin, bê pirsîn. Her wiha îşaret pê kir ku divê mêr berpirsyariyên xwe bi cih bînin, tevahî têgînin ku tundiya li dijî jinan rewa dikin bişkînin û hişmendiya wekheviyê pêş bixin.

Çalakî bi berzkirina dirûşmên "Jin Jiyan, Azadî" bi dawî bû.

(sş/bb)

ANHA