Xebatên birêxistinkirina jinan li gundewarên Reqayê

REQA

Buroya Jinan a Meclisa Sivîl a Reqayê bi armanca birêxistinkirin û pewerdekirina jinan li gundewarên Reqayê xebatên xwe didomîne. Buro îro bi merasîmekê navenda xwe li bajarokê Hemrat vekir.

Nûnerên Meclisa Jinên Sûriyeyê, Buroya Jinan a Meclisa Sivîl a Reqayê, saziyên sivîl û leşkerî yên herêma Kerama û gundewarên wê di merasîmê de amade bûn. Merasîm bi rêzgirtinê dest pê kir. Bi navê Meclisa Sûriyeya Demokratîk rêvebera meclisê Rûqeya El-Elo, bi navê Meclisa Jinan a Reqayê Meryem El-Ebo, rêvebera Asayîşa Kerama Fatin Xabûr, Hevserokatiya Meclisa Kerama Esma El-Rudeynî û bi navê jinên gundewarên rojhilatê Reqayê Sewsen El-Xelef axaftin kirin.

Kesên axivîn, vekirina buroya li jinan pîroz kir û got ev buro dê bibe gava yekem a bi pêşxistina jinan û rizgarkirina wan ji hişmendiya tarî.

Di axaftinan de her wiha rola jinan a di avakirina civakê de û berxwedana li eniyên şer li dijî komên tarî hate destnîşankirin û soza şopandina rêya şehîdan hate dayîn.

Şirîta vekirina buroyê di nava tilîliyên dayikan de ji aliyê dayik û hevjînên şehîdên Kerama ve hate qutkirin. Merasîm bi gerandina xelekên govendê bi dawî bû.

ANHA