Malbatên dîlgirtiyan li benda zarokên xwe ne

Malbatên dîlgirtiyan ev bûye 117 roj bi şev û roj li benda zarokên xwe ne ku agahiyekê jê bigirin û li bendê ne ku zarokên wan serbest werin berdan.

Narîman Remedan ji perava Sûriyeyê ye û niha li bajarê Dirbêsiyê dimîne. Hevjînê wê li gundê Sebah El Xêr ê di navbera Reqa û Hesekê de ji aliyê komên çekdar ve hatiye girtin. Ew şervanekî QSD`ê bû û hevjîna wî Narîman got piştî hatiye girtin heyanî niha tu agahî jê wernegirtine û aqûbeta wî ne diyar e.

Narîmanê anî ziman ku hevjînê wê 18`ê Kanûnê saet 18:00’an hatiye girtin. Li gorî Narîmanê piştî mehek û nîv endamekî hikumeta demkî li gel diaxive û jê re dibêje hevjînê wê li Reqayê li gel hikumeta demkî girtî ye.

Piştî demekê Narîman di dîmeneke li ser medya dijîtal de dibîne ku di lêpirsînê de hevjînê wê îşkence dikin û ew nizane ku hevjînê wê li ku derê ye.

Narîman, zarok û hevjînê xwe ji ber rewşa aborî ji peravê derbasî bajarê Dirbêsiyê dibin. Piştî ku hevjînê wê hatiye girtin niha ew û 2 zarokên xwe bi tenê li bajarê Dirbêsiyê dimînin. Narîmanê ji aliyên têkildar xwest hevjînê wê serbest were berdan.

Her wiha Talib Diyab Hisên ê ji Dirbêsiyê got kurê wî Berzan Hisên ev bûye derdora 4 mehan girtî ye.  Hisên anî ziman ku berî şer kurê wî Berzan li çiyayê Kizwanan di perwerdeyê de bû, perwerdeya wan 4 mehan dirêj kiriye. Piştî perwerde bi dawî bûye, şer dest pê kiriye û seferberî hatiye ragihandin. Ji wê demê agahî ji Berzan nagire û aqûbeta wî ne diyar e.

Hisên got wî ji dîlên ku serbest hatine berdan li rewşa kurê xwe pirsiye û wan agahî da ye ku kurê wî di girtîgeha Helebê de ye.

Her wiha diyar kir ku ew tenê dixwazin ku kurê wan vegere malê û bang li aliyên têkildar, rêxistinên mafên mirovan û hikumeta demkî kir ku hemû dîl serbest werin berdan û li malbatên xwe vegerin.

Hind Xidir a ji bajarê Dirbêsiyê jî daxwaz kir ku aqûbeta kurê wê Mehmûd Feysel Elî diyar bibe. Her wiha Hind Xidir da zanîn ku têkildarî Mehmûd tu agahiyên zelal negirtine û nizanin ka şehîd e yan jî di girtîgehê de ye û got Mehmûd beşdarî şerê taxa Şêxmeqsûd bûye. Ji wan re gotine ku di şer de şehîd bûye û cenazeya wî negirtine.

Heyanî niha malbata Mehmûd tu agahiyên zelal li ser rewşa wî wernegirtine û fermî ji wan re nehatiye gotin ku kurê wan şehîd e.

Hind Xidir di dawiyê de got ew dixwazin dengê wê bigihêjê raya giştî û hemû dîl li malbatên xwe vegerin.

 (np)

ANHA