Alîkariya ji bo koçber û gelê Rojava dewam dike

Di 6’ê Çileyê de çeteyên dewleta Tirk a dagirker û hikumeta demkî ya Şamê êrişî taxên Şêxmeqsûd û Eşrefiyê yên Helebê kir û heta niha êrişên xwe ranewestandine. Ji ber êrişên çeteyan ên li ser her du taxan, Dêr Hafir, Reqa, Tebqa û Dêrazorê, 150 hezar koçberên ji Efrînê, Serêkaniyê, kampên Eyn Îsa û Elewiyan berê xwe da kantonên Firat û Cizîrê yên Rojavayê Kurdistanê. 

Koçberan ji ber êrişan tu tişt ji malên xwe dernexistin û di sermayê de ketin ser rêyan. Piştî piştgiriyeke mezin a gelê Başûr û Bakurê Kurdistanê, gelê Kurd û dostên xwe yên li dîasporayê alîkariyeke mezin ji gelê Rojava re şand.

Ji roja 20’ê Çileyê ve gelek rêxistinan ji bo alîkariyê berê xwe daye Rojavayê Kurdistanê.

Ji bo belavkirina alîkariyan Heyva Sor a Kurd û Meclisa Koçberên Efrîn-Şehbayê bi hev re kar dikin. Alîkariyên ku tên li Parka Azadî ya li bajarê Qamişloyê, navendên Heyva Sor a Kurd ên li Qamişlo û Amûdê kom dibin. Hevya Sor a Kurd û Meclisa Efrîn-Şehbayê komîteyek ji bo belavkirina alîkariyan ava kiriye û alîkariyan belav dike.

Li gorî agahiyên me ji Meclisa Koçberan a Efrîn-Şehbayê girtine, gelek malbatên efrînî li malên efrîniyên ku di dema valakirina Şehbayê de (8 Kanûn 2024) hatibûn herêmê, bi cih bûne. Li kantona Cizîrê jî 123 navend (dibistan, mizgeft, akademî, danîngeh, sazî û dezgeh) ji bo koçberan hatine vekirin. Hîna gelek malbat di wesayîtan de mane û bicihkirina wan didome.

Piştî alîkariyên ku li navendên hatine diyarkirin tên belavkirin, rêxistin berê xwe didin malên ku koçber lê bi cih bûne.

RÊXISTINÊN KU ALÎKARÎ ŞANDINE

Rêxistinên heta niha alîkarî gihandine Rojava ev in: Rêxistina Acted a Fransî, Rêxistina Navneteweyî ya CARE (Cooperative for Assistance and Relief Everywhere), Rêxistina Blumont ku navnetewî ye û li Sûriyeyê kar dike, Rêxistina Solidarit International a Fransî, Weqfa Xêrxwaziyê ya Barzanî, Rêxistina Bihar, Rêxistina My Fram, Neteweyên Yekbûyî, Semî, Bijîşkên Bêsînor, Rêxistina Rojava, Rêxistina Awat, Rêxistina Hana û Rêxistina Rabîtat ên Başûrê Kurdistanê, Rêxistina Parastina Zarokan a Başûrê Kurdistanê, Kompaniya Rcell, Kompaniya Mîdîko ya Almanyayê, Gundê Aştiyê yê Almanyayê,  Heyva Sor a Kurd, Rêxistina Xurekê ya Cîhanê, Yekitiya Bijîşkên Kurd a li Almanyayê, Heyva Sor a Kurdistanî ya li Ewropayê, kanalên TV’yê yên Başûrê Kurdistanê, Tevgera Helwest a Nîştimanî ya Kurdistanê û însiyatîfên şexsî.

Heta niha zêdetirî 365 kamyonên alîkariyê û 20 tang mazot di deriyê Sêmalkayê re hatine Rojava. Alîkarî yekser derbasî bajarê Qamişloyê dibin. Li Qamişlo û Amûdê tên depokirin. Rcell jî hezar pakêtên alîkariyê belav kirine. Alîkarî berdewam in. Rêxistin alîkariyên wekî xwarin, pêwîstiyên jin û zarokan, doşek û betanî û dermanan dişînin.

Her wiha gelê Başûr, rêxistin û gelên li Ewropayê jî alîkariya diravî dişînin. Gelê bajarên Qamişlo, Rimêlan, Dêrik, Amûdê, Tirbespiyê jî alîkariya koçberên di taxên xwe de dikin.

Rêveberiya Xweser jî mazotê li navendan belav dike û deriyê nexweşxaneyan ji bo koçberan vekirine.

Heyva Sor a Kurd jî li 3 klînîk (yek li Dêrikê û 2 li Qamişloyê) vekirine, ev klînîk gerok in û serdana navendên koçber lê bi cih bûne, dikin. Klînîkan hejmarên telefonan diyar kirine ku gel xwe bigihîne wan. Hejmarên telefonên Heyva Sor wiha ne. +963996877447, +963932125933.

Piştî alîkariyên ku li navendan hatine diyarkirin tên belavkirin, rêxistin berê xwe didin malên ku koçber lê bi cih bûne.

Li Kobanê jî heta niha Neteweyên Yekbûyî carekê alîkarî şandiye, lê ji ber bajar di dorpêçê de ye rêxistinên mirovî li hev dicivin û li rêyan digerin ku alîkariyan bişînin Kobanê jî. Li Hesekê jî pêwîstiya gel bi alîkariyê heye. Duh Neteweyên Yekbûyî 30 kamyonên alîkariyê ji Hesekê re şandin. Rêxistin dixwazin derbasî Kobanê jî bibin.

(bî-jn)

ANHA