Til Avîv gefên tund li desthilata Şamê xwarin

Wezîrê Parastinê yê Îsraîlê, Yisrael Katz li hember berdewamkirina "binpêkirinên li dijî Durziyan li Sûriyeyê" hişyarî da serokê desthilata Şamê Ehmed El Şerî û got, eger ew binpêkirin ranewestin wê Til Avîv bersiveke mezin bide.

Katz got ku piştî êrişên li dijî Duzriyên li Sûriyeyê wî û serokê hikumeta Îsraîlê talîmat da artêşa Îsraîlê ku gelek derbeyên hişyariyê li dijî komên tundraw pêk bînin û peyamek zelal da desthilata Şamê ku ew li hember qedexekirina van binpêkirinan berpirsiyar e.

Katz anî ziman ku ew pabend in parastina Durziyan bikin û bûyeran dişopînin û eger dîsa binpêkirin li dijî Durziyan pêk hatin û rejîmê qedexe nekir, wê rastî bersiveke mezin werin.

Girêdayî wê, berdevkê artêşa Îsraîlê Avichae Adraee di daxuyaniyekê de got ku Îsraîlê hin welatiyên Durzî ji bo dermankirinê veguhastine Îsraîlê û li navenda tenduristiyê ya Sefed tên dermankirin. Ew welatî di pevçûnên li Sûriyeyê de birîndar bûbûn.

Adraee got hêzên artêşa Îsraîlê li herêma başûrê Sûriyeyê belav bûne û ji bo pêşî li derbasbûna hêzên dijber ji bo herêmê û gundên Durziyan bigirin amade ne. Her wiha artêş pêşdeçûnan dişopîne û ji bo dan û standinê bi sînaryoyên cihêreng re bike di nava amadebeşiyê de ye.

(mh/fr)