Siyasetmedaran rola partiyên siyasî di pêvajoya veguhêz de gotûbêj kir

Partiya Nûjenî û Demokrasiyê ya Sûriyeyê li bajarê Reqayê, der barê rola partiyên siyasî di pêvajoya veguhêz de panelek li dar xist.  Nûnerên Meclisa Sûriyeya Demokratîk (MSD) û Rêveberiya Xweser a Bakur û Rojhilatê Sûriyeyê tev li panelê bûn.

Di panelê de li Hola Krîstal a li navenda Reqayê hate lidarxistin, beşdaran nêrînên xwe yên siyasî ji bo qonaxa veguhêz a piştî hilweşîna rejîma Baasê û bandorên rewşa heyî li ser siberoja welêt anîn ziman.

Panel ji hêla berdevkê Partiya Nûnejî û Demokrasiyê ya Sûriyeyê Mihemed El Ebûd, endama partiyê Sozan Sifog û cîgira serokê Meclisa Gelan a Demokratîk a Reqayê Ebdilselam Hemsork ve hate birêvebirin.

Beşdaran destnîşan kir ku divê partiyên siyasî yên Sûriyeyê wek bersivek ji bo pêdiviya civakê ya bi siyaseteke ku nirxên azadî, wekhevî û mafên mirovan biparêze, bixebitin. Her wiha divê li dijî hegemonyaya çandî û siyasî tê bikoşin.

Siyasetmedaran destnîşan kir ku partiyên siyasî li Bakur û Rojhilatê Sûriyeyê û li deverên din ên ku hin partî dikarin bi veşartî an aşkera bixebitin, roleke girîng ji bo piştgiriya şoreşa Sûriyeyê lîst, li dijî her cure zordariyê derketin û çalakiyên siyasî û civakî kirin.

Beşdaran her wiha bal kişand ser girîngiya xurtkirina rola partiyên siyasî ji bo berfirehkirina beşdariya gel û dan zanîn ku divê partî wek platformên birêxistinkirî ji bo pêşvebirina demokrasiyê xizmetê bikin, çavdêriya desthilatê bikin û bibin hevkarên biryarên girîng ên ku bandorê li siberoja welêt dikin.

Siyasetmdaran xwest jîngeheke ewle ji bo çalakiyên siyasî yên sivîl di hundirê Sûriyeyê de were peydakirin.

(k)

ANHA