Merasîma sersaxiyê ya şehîd Nûreddîn Sofî bi dayîna peyamên dilsoziyê berdewam e

Merasîma sersaxiyê ya fermandar û pêşengê şoreşa Bakur û Rojhilatê Sûriyeyê Nûreddîn Sofî berdewam e. Şênî ji tevahî herêmên Bakur û Rojhilatê Sûriyeyê tev li merasîmê dibin û dilsoziya xwe bi têkoşîna şehîd re nû dikin.

Bi hezaran şêniyên herêmê, Saziya Malbatên Şehîdan, rêxistin û deste, Kongra Star, rûspiyên êlên ereb, partî, rêxistinên pêkhateya suryan, şervan û fermandarên Hêzên Sûriya Demokratîk (QSD), Kongreya Îslama Demokratîk, Hêzên Ewlekariya Hundirîn, Yekîneyên Parastina Gel (YPG), Partiya Yekitiya Demokratîk (PYD), hêzên operasyon û trafîkê jî tev li merasîmê bûn.

Di merasîmê de dayîka şehîd Mihemed Mehmûd, Xedîce Dawûd helbestek diyarî giyanê şehîd Nûreddîn Sofî kir.

Her wiha hevserokê Saziya Malbatên Şehîdan Rêzan Gulo jî axivî û got: “Em soz didin ku rêya şehîdan bidomînin heta ku azadiyê û edaletê bi dest bixin.”

Fermandarê giştî yê Hêzên Ewlekariya Hundirîn Seydo Efrîn jî got: “Hevalê tevahî pêkahteyan bû. Kesayetek îstisna bû ku dê her tim di dilê her kesî de zindî bimîne. Em soz didin ku rêya wî heta dilopa xwîna dawîn bişopînin.”

Fermandarê giştî yê Hêzên Erka Xweparastinê Nûrî Mehmûd jî diyar kir ku şehadeta fermandar Nûreddîn Sofî, ji bo wan mînareya îlhamê û fedakariyê ye û şehîd Nûreddîn ramanên Rêber Abdullah Ocalan ji bo xizmetkirina welêt û gel, bi cih anî.

Rûspiyê qebîleya El Cebûr Ekrem Mehşûş jî pîvanên ku fermandar Nûreddîn Sofî li ser dimeşî, hewldanên wî ji bo yekkirina pêkhetayan li hember êrişên dagirkeriya Tirk, silav kir.

Li bajarê Dêrikê jî Meclisa Malbatên Şehîdan ji bo şehîd Nûreddîn Sofî merasîma sersaxiyê li Navenda Tevgera Ciwanên Şoreşger a Sûriyeyê ya şehîd Bawer hate lidarxistin. Bi sedan şênî, nûnerên saziyên Rêveberiya Xweser û siyasetmedar hazir bûn.

Endama Meclisa Malbatên Şehîdan Gulistan Osman axivî û got: “Fermandar Nûreddîn Sofî beşeke projeya rizgarkirinê bû ku di berxwedanê de kok daye.”

Hevserokê PYD`ê Xerîb Hiso jî destnîşan kir ku fermandar Sofî, fermandarekî stratejîk bû, rewşenbîrekî enternasyonalîst bû, bê cudahî civakek ava kir  bû sembola berxwedana gelan.

Di dawiya merasîmê de, girseyê slogan û dirûşmên domandina têkoşîna şehîd Nûreddîn Sofî û ew ê di bîra gelan de zindî bimîne, berz kir.

(şx)

ANHA

QAMIŞLO

DÊRIK