Li Şehbayê ji bo azadiya Rêber Abdullah Ocalan meş

Xelkê Şehbayê û koçberên Efrînê bi meşeke girseyî piştgirî da pêngava navneteweyî ya "Ji Rêber Abdullah Ocalan re azadî, ji pirsgirêka Kurd re çareserî".

ROJANE

24 îlon, 2024 21:49

ŞEHBA

Kongra Star a kantona Efrîn û Şehbayê di çarçoveya pêngava navneteweyî ya bi daxwaza azadiya fîzîkî ya Rêber Abdullah Ocalan û çareseriya pirsgirêka Kurd de meşek li dar xist.

Meş ji rêya kampa Serdem a bajarokê Ehdas dest pê kir û heta avahiya Şaredariya gundê Til Sosin bi rê ket.

Li wir bi navê Tevgera Jinan a kantona Efrînê Ferîde Îbo got: "Gelê Kurd li ser şopa fikrên Rêber Abdullah Ocalan e û ew ê ji bo pêkanîna azadiya wî ya fîzîkî û çareserkirina pirsgirêka Kurd, têkoşînê bidomîne."

Ferîde Îbo xiyaneta Partiya Demokrat a Kurdistanê (PDK) ya bi pergalên kapîtalîst re di dîlgirtina Rêber Abdullah Ocalan de şermezar kir û got: "Dîrok îsbat dike ku malbata Barzanî îxanetê dike."

Her wiha bi navê tevgerê Elîf Şêx Ehmed destnîşan kir ku Rêber Abdullah Ocalan di zanakirina jinan û civakê de roleke girîng lîst û girtîgeha Îmraliyê kir çavkaniya azadî, mirovahî û jiyanê.

(mh)

ANHA