Koçberên Serêkaniyê hewlên kirîna milkên wan şermezar kirin

Meclisa Kampa Serêkaniyê ya koçberan, ku li gundewarê bajarê Hesekê yê kantona Cizîrê ye, der barê sûcên dewleta Tirk a dagirker û çeteyên wê, bi taybet hewldanên kirîna milk û erdên welatiyên Kurd ên ku bi zorê ji bajarê xwe hatine koçberkirin de, daxuyaniyek da.

Daxuyanî bi amadebûna bi dehan şêniyên kampê û endamên rêxistinên civaka sivîl, ji hêla endama Meclisa Jinan a kampê Senaa Ehmed Hisên ve li ber konê rêveberiya kampê hate xwendin.

Di daxuyaniyê de hat gotin ku hewldanên kirîna milk û erdên kesên bi zorê koçber bûne kiryareke neqanûnî ye, armanca wê guhertina demografî û dîroka gelên resen wekî Kurd, Suryanî, Asûrî û Ereb e. Her wiha hişyarî da ku her firotin an kirîna di bin şert û mercên dagirkeriyê de ne kiryareke qanûnî ye.

Daxuyaniyê bal kişand ku li navendên saziyên sivîl ên li bajarê dagirkirî, alên Tirkiyê, sembla bajarê Rihayê yê Bakurê Kurdistanê û ala Pakistanê hatine daliqandin û da zanîn ku ev sazî ji hêla îstîxbarata Tirkiyê û çeteyên wê ve têne birêvebirin.

Koçberan di daxuyaniya xwe de polîtîkayên êrişkar ên Tirkiyeyê şermezar kirin û bang li saziyên navneteweyî kir ku berpirsiyariyên xwe yên yasayî û mirovî bi cih bînin û ji bo bidawîkirina dagirkeriyê û vegera ewle ya koçberan tavilê tedbîran bigirin.

Koçberan piştî xwendina daxuyaniyê dirûşmên "Na ji tundî û zilmê re, na ji firotina milkên xelkê Serêkaniyê re, na ji bicihkirina çeteyan li Serêkaniyê re" berz kirin.

(k)