Koçberên li stargehên kantona Cizîrê di şert û mercên dijwar de dijîn

Ji ber êrişên berdewam ên çeteyên hikumeta demkî ya Sûriyeyê ev cara sêyemîn e ku xelkê Efrîn û Şehbayê koçber dibe. Bi hezaran koçber neçar mane ku ber bi kantona Cizîrê ve biçin.

Malbatên koçber di şert û mercên mirovî yên pir dijwar de dijîn. Ew li gelek dibistanên ku pêdiviyên bingehîn lê tune ne, hatine bicihkirin. Ji bilî sermayê, koçber êş û derdê kêmbûna pêdiviyên bingehîn dikişînin, mîna xwarin, betanî, alavên germkirinê, her wiha pêdiviyên tenduristiyê. Vê yekê rewşa mirovî dijwartir kiriye.

Tevî derferên kêm, xelkê Cizîrê hevgirtineke mezin bi koçberan re nîşan da, pêşwazî li wan kir û piştgiriya madî û manewî pêşkêş kir. Şêniyên Cizîrê ji bo koçberan betanî û xwarin peyda kirin da ku êşa wan sivik bikin. Her wiha saziyên Rêveberiya Xweser jî li gorî derfetên xwe yên berdest ji bo piştgiriya koçberan dixebite.

Nûçegihanên ajansa me dîmenên biêş ên koçberan kişandin. Bi dehan malbat li erdê di odeyên bê pêdiviyên bingehîn de radizên ku tenê betanî lê hene ku wan ji sermaya zivistanê ya dijwar naparêze.

Di dîmen û wêneyan de xuya dibe ku malbatên di bin betaniyan de kom bûne û li germahiyê digerin, dayikên hewl didin zarokên xwe tevî şert û mercên dijwar aram bikin û hin jin avê li ser sobeyan germ dikin. Zarokekî biçûk çûka xwe yê biçûk hilgirtiye ku ew bûye hevala rêwîtiya wî ya koçberiyê.

Ev dîmen asta karesata mirovî ya ku ji ber êrişên berdewam nîşan didin û rastiyeke trajîk aşkera dikin ku koçber ji pêdiviyên herî bingehîn ên jiyanê bê par in.

(k)

ANHA