Ji Îspanya banga ‘Ji Abdullah Ocalan re azadî’

Sendîkayên cuda yên li Îspanya û herêmên wê yên xweser, beriya 15’ê Sibatê daxuyaniyeke hevpar weşand û daxwaza serbestberdana Rêber Apo û naskirina statuya siyasî û civakî ya gelê Kurd kir.

13 sibat, 2026 18:38

NAVENDA NÛÇEYAN

Di daxuyaniyê de imzeya sendîkayên ji Îspanya, Welatê Bask, Galîstya, Katalonya, Astûryas û Giravên Kanaryayê cih girt.

Sendîkayan destnîşan kir ku 15’ê Sibatê îşaret bi salvegera 27’an a girtina Rêber Apo dike, yê ku wek “sembola têkoşîna dadwerî, azadî û mafên gelan” tê pênasekirin.

Saziyên îmzekar diyar kirin ku ji bo dabînkirina aştî û stabîlîzasyonê li Rojhilata Navîn, azadiya Rêber Apo “lezgîn û elzem” e û banga serbestberdana wî ya tavilê kirin.

Di tekstê de bang li Tirkiyeyê hat kirin ku ji bo aştiyê gavan bihavêje û hat diyarkirin ku ev pêvajo dikare bi serbestberdana Rêber Apo û rêzgirtina li mafên gelê Kurd bi pêş ve biçe. Hat destnîşankirin ku piştgirî; li ser bingeha dadwerî, demokrasî û piralîbûnê naskirina cihêrengiyan esas digire.

Di daxuyaniyê de her wiha ev hatin diyarkirin:

"Paradîgmaya ku ji aliyê Ocalan ve hatî avakirin, wekî ku li Rojava hatiye pêşxistin, pergaleke ku xwe dispêre azadiya jinê, jiyana bi hev re ya cihêrengiyan û avakirina civakên piralî pêşniyar dike. Ev model, bi îsbatkirina ku dadwerî, demokrasî û hevkariya di navbera gelan de pêkan e, dikare ji bo her kesî bibe mînak.

Berxwedana Kurdan a ku bi dehan salan e berdewam dike, nîşan daye ku divê civaka navneteweyî rêzê li maf û daxwazên gelê Kurd bigire û statuyeke siyasî û civakî ya rewa bide wan."

Di daxuyaniya hevpar de hat gotin: "Wek sendîkayên xwe, em pabendbûna xwe ya bi piştgirî û dadwerî dubare dikin; em bang li hemû sazî û hikûmetên cîhanê dikin ku piştgiriyê bidin serbestberdana Ocalan û naskirina mafên gelê Kurd."

Sendîkayên îmzekar ev in:

Konfederasyona Sendîkayan a Komîsyonên Karkeran – CCOO

Konfederasyona Navsendîkayî – CI

Konfederasyona Giştî ya Karkeran – CGT

Konfederasyona Navsendîkayî ya Galîstya – CIG

Kolektîfa Karkerên Yekbûyî – CUT

Herikîna Sendîkayî ya Çep a Astûryas – CSI

Piştgiriya Karkerên Bask – ELA

Konfederasyona Sendîkayî ya Çep – ESK SINDIKATUA

Navsendîkayî ya Alternatîf a Katalonya – IAC

Navsendîkayî ya Astûryas – INAST

Navsendîkayî ya Valensiya

La Intersindical (Katalonya)

Komîteyên Neteweperest ên Karkeran – LAB

Tevgera Karkeran a Giravên Kanaryayê – MTC

Rêxistina Sendîkayî ya Karkerên Aragon – OSTA

Konfederasyona Piştgiriya Karkeran