Iraqê têkildarî êrişên li ser taxên Helebê hişyarî da

Wezîrê Karên Derve yê Iraqê Fûad Husên fikarên xwe ji bo êrişên li ser taxên Kurdan yên Helebê û hedefgirtina sivîlan ji aliyê çeteyên HTŞ’ê yên hikûmeta demkî ya Şamê nîşan da.

8 ÇILE, 2026 19:20

NAVENDA NÛÇEYAN

Wezîrê Karên Derve yê Iraqê Fûad Husên, bi rêya telefonê bi Wezîrê Karên Derve yê Erebistana Siûdî Feysel Bin Ferhan El-Siûd têkildarî êrişên çeteyên HTŞ’ê yên li ser taxên Şexmeqsûd û Eşrefiyê axivî.

Fûad Husên got; “Em nîgeraniya xwe ya kûr li ser êrişên ku li ser deverên sivîl û malên wan yên Helebê têne kirin, ku bûne sedema koçberbûna bi hezaran welatiyên Kurd ji malên xwe, nîşan didin.

Divê şer raweste û danûstandinên di navbera hikûmeta demkî ya Sûriyeyê û Hêzên Sûriyeyê yên Demokratîk (QSD) de ji bo çareserkirina pirsgirêkan û pêşîgirtina li tunduyê berdewam bikin.”

Wezîrê Karên Derve Fûad Husên tekezî li ser girîngiya hewldanên hevbeş ji bo rawestandina êrişên li ser sivîlan û piştgiriya ewlehî û aramiya li Sûriyeyê kir û hişyarî da ku eger ev êrişane bidomin dê bandorek rasterast li ser rewşa Iraqê jî bike.”

Iraq û Erebistana Siûdî tekezî li ser pêwîstiya têkiliyê bi hikûmeta demkî ya Sûriyeyê re kirin da ku bi awayekî cidî li ser pêşketinan nîqaş bikin û pirsgirêkên Sûriyeyê çareser bikin.”