Hêrsa li hemberî komkujiyên li Helebê

Xwendekar, saziyên perwerde û fêrkirinê û Meclisa Jinan a PYD’ê bi daxuyaniyan komkujiyên ku çeteyên hikumeta demkî li Şêxmeqsûd û Eşrefiyê kirine û bêdengiya navneteweyî şermezar kirin.

Komeleya Perwerdeyê ya bajarê Tirbespiyê li Dibistana Şehîd Cahîda Ronak, Dibistana Şehîd Warşîn û Dibistana Şehîd Nezîr bi amadebûna bi dehan xwendekar û mamosteyan daxuyanî dan.

Daxuyanî ji hêla şagirta bi navê Bêrî Seyîd bi zimanê kurdî li Dibistana Şehîd Warşîn hate xwendin.

Rêveberiya Dibistanan a bajarê Çilaxayê jî bi amadebûna xwendekaran û kadroyên perwerde û fêrkirinê daxuyaniyek li dibistana gundê Dêrna Axê da. Xwendekara bi navê Hiyam El Kurdî daxuyanî xwend.

Xwendekarên Dibistana Şehîd Seydo ya bajarê Kobanê jî daxuyanî da. Xwendekar Mihemed Mihemed û Zelîxan Mihemed daxuyanî xwend.

Meclisa Jinan a PYD’ê jî li kolana sereke ya bajarê Kobanê bi amadebûna endamên meclisê û nûnerên saziyên jinan ên kantona Firatê daxuyaniyek da. Daxuyanî ji aliyê endama meclisê Bedîha Miho ve hat xwendin.

Di daxuyaniyan de sûc û komkujiyên ku çeteyan li Şêxmeqsûd, Eşrefiye û Benî Zêd kirine, her wiha bêdengiya li hemberî van sûcan hatin şermezarkirin.

Di daxuyaniyan de îşaret bi berxwedana dîrokî ya Hêzên Ewlekariya Hundirîn ên Şêxmeqsûd û Eşrefiyê hat kirin û silavkirin. Di daxuyaniyan de banga vekirina lêkolîneke serbixwe ya navneteweyî ji bo hesabpirsîna ji sûcan hat kirin, her wiha banga parastina zarokan û mîsogerkirina mafên wan ên perwerde û lênerîna bijîşkî, bêrêziya li hemberî mafên hemû pêkhateyan hat kirin.

Hate diyarkirin ku hêzên navneteweyî berpirsên van sûcan in û bang li rêxistinên hiqûqî û mirovî hat kirin ku erkên xwe yên exlaqî û mirovî pêk bînin, hesab bixwazin û edaletê ji qurbaniyên êrişên li ser her du taxan re pêk bînin. Hate gotin, cîhan bi bêdengiya xwe şirîkê komkujiyan e.

Daxuyanî bi berzkirina dirûşmên dilsoziya bi şehîdan re û silavkirina berxwedana Şêxmeqsûdê bi dawî bûn.

(b)