Hejmara qurbaniyên lehiya Mexribê derket 37 kesan

Li gorî rayedaran li bajarê Asifî yê 250 kîlometreyan li başûrê Kazablankayê û nêzîkî 300 hezar kes lê dijîn, ji ber bobelata lehiyan 37 kesan jiyana xwe ji dest daye. Ev bûyer, weke mezintirîn bobelata lehiyê ya 10 salên dawîn a li Mexribê hate tomarkirin.

Rayedarên xwecihî da zanîn ku barînên zêde yên di nava saetekê de bûne sedema lehiyên ji nişka ve û dijwar. Di dîmenên ku ji aliyê niştecihên bajarî ve hatine girtin de tê dîtin ku kolan veguherîne rêya avên qirêj û wesayît û gelek tiştên din dikevin ber ava lehiyê.

Rayedaran diyar kir ku ji bilî kesên jiyana xwe ji dest daye gelek birîndar jî hene û 32 welatî rakirine nexweşxaneyê. Hate ragihandin ku piraniya birîndaran piştî tedawiya hewce ji nexweşxaneyê derketine.

Şeva yekşemê asta avê daketiye û li şûna xwe wêraniya kolanên ji heriyê û wesayîtên qelibî hiştiye.

Ekîbên sivîl ên parastinê û hêzên alîkar ên ewlehiyê xebatên xwe yên rakirina enkazê û lêgerîna kesên winda didomînin.

Rayedar ji bo gihandina alîkariyan seferber bûne û hişyariyê didin ku dibe ku hejmara kesên jiyana xwe ji dest bidin, zêde bibe.