Desteya Tenduristiyê ya Dêrazorê civîna salane li dar xist

Desteya Tenduristiyê ya kantona Dêrazorê civîna xwe ya salane li hola Meclisa Çand û Ronakbîriyê ya herêma Meamil li dar xist. Di civînê de xebatên 2025ˊan hatin nirxandin.

Endamên Desteya Tenduristiyê ya kantonê, hejmarek ji bijîşk û hemşîreyan, nûnerên ji Desteya Tenduristiyê ya Herêma Bakur û Rojhilatê Sûriyeyê, nûnerên ji Meclisa Gelan, Meclisa Rêveber, endamên Meclisa Kombûna Jinan a Zenûbiya ya kantonê tev li civînê bûn.

Civîn bi deqeyeke rêzgirtinê dest pê kir, dûre hevserokê Desteya Tenduristiyê ya kantona Dêrazorê Hemîd El Ehmed rewşa siyasî û pêşdeçûnên li Sûriyeyê nirxand.

Piştre hevseroka Desteya Tenduristiyê ay kantonê Mihdiye El Nasir rapora salê ya desteyê xwend. Di raporê de hejmara nexweşxane û navendên tenduristiyê hatin diyarkirin, 14 proje hatin pêkanîn û xebata sazûmaniya navendên tenduristiyê hat kirin.

Desteyê sînevîzyonek der barê xebatên xwe de pêşkêş kir. hevserokê Desteya Tenduristiyê ya Herêma Bakur û Rojhilatê Sûriyeyê Mihemed Nûr jî rapora salê nirxand û rewşa beşa tenduristiyê ya giştî şîrove kir.

Dûre beşdaran têbîniyên xwe û mijarên girîng pêşkêş kirin. Hat diyarkirin ku pêwîstî bi pêşxistina zanabûna tenduristiyê di nava civakê de heye, divê bernameyên jîngehî ji bo misogeriya paqijiya navendên tenduristiyê û nexweşxaneyan werin danîn, ji bo xurtkirina beşa tenduristiyê û garantiya mafên welatiyan û pêkanîna edalet û wekheviyê pabendî bi Hevpeymana Civakî were kirin.

Beşdaran anî ziman ku divê alava radyolojiyê ya li Nexweşxaneya Ebû Heman were çaksazîkirin, divê pere ji bo çaksazîkirina alavên xerab ên nexweşxane û navendên tenduristiyê were veqetandin.

Civîn bi van pêşniyazan bi dawî bû:

Xebitîna li ser avakirinên xizmetguzariyeke zêde ku lênêrîneke bibandor pêk tîne û xalên şopandina tenduristiyê werin berfirehkirin.

Xurtkirina hevkariyên derve, aktîvkirin û hevrêziyên hevbeş bi rêxistinên navneteweyî û çalakiyên civakî re ji bo piştgiriya projeyên geşepêdanê li derveyî xalên desteyê, da ku hevgirtina hewlan were birêxistinkirin.

Li darxistina kampanyayên pêşîlêgirtina stratejîk, zêdekirina înîsiyatîfên hişyarkirina meydanî û têkoşîna li dijî nexweşiyên civakî, nemaze li dijî madeyên hişberê, ji bo parastina mozaîka civakî û misogerkirina ewlehiya wan.

Pêşxistina binesaziyê û girîngîdayîna veberhênana derfetên berdest ji bo pêkanîna beşeke tendurist û başkirina rastiya xizmetguzariyê.

(fr)

ANHA