Çalakiyên Roja Ciwanan a Cîhanê dewam dikin

Îro çalakiyên bi boneya Roja Ciwanan a Cîhanê ku duh (12 Tebax) li bajarên Qamişlo û Hesekê dest pê kiribû, dewam kir. Di komxebatan de dozên girêdayî ciwanan û rola wan di siberojê de hatin nîqaşkirin.

HESEKÊ

Di roja duyemîn a komxebata li bajarê Hesekê de, gerînendeyê perwerdeyê yê Parêzgeha Hesekê Idnan El Berî jî amade bû.

Di komxebatê de bal kişandin ser astengî û pirsgirêkên li pêşiya ciwanan, pêwîstiyên wan, piştgirî û pêşxistina behreyên wan, beşdariya wan a aktîf di civakê de.

Serokê Rêveberiya Saziya Lînk Hanî El Hemzê jî got: “Çalakî bi armanca vekirina qadekê ji bo ciwan nêrînên xwe bi rêya wê parve bikin, tê lidarxistin.”

QAMIŞLO

Çalakiya rêveberiya çandê ya parêzgeha Hesekê ya bi boneya Roja Ciwanan a Navneteweyî bi piştgiriya rêxistina UNICEF’ê li Navenda Çandê ya Qamişloyê bi atolyeyekê dewam kir. Çalakî ji milê Dr. Hejar Rustem ve hat birêvebirin û hejmarek ciwan tev lê bûn.

Di çalakiyê de ciwanan anî ziman ku pêwîst e rêzgirtina nêrîna raya giştî hebe û ciwan bibin xwedî hêza rexnekirinê.

Piştre Dr. Hejar Rustem jî diyar kir em fikrên xwe ji bo guhertina civakê bi kar tînin, her wiha anî ziman ku wekheviya di navbera jin û zilam de ji bo civakê xwedî girîngiyeke mezin e.

Çalakiyên Roja Ciwanan a Navneteweyî dê di roja sêyem de bi şahiyekê bi dawî bibin.

ANHA