Li Dirbêsiyê bi hezeran şehîdên Pêngava Gurzê  Gelan oxir kirin

Bi hezeran şêniyên navçeya Dirbêsiyê, Zirgan û gundewarên wê cenazeyê 9 şervanên QSD`ê û xebatkarên girtîgeha li Goristana Şehîd Rustem Cûdî ya li gundê Berkevirê ya navçeya Dirbêsiyê ya kantona Hesekê ya Bakur û Rojhilatê Sûriyê oxir kirin.

Karwanê şehîd Hisên El-Berî, Umran Xilêf, Malid Hesen, Kemal Memo, Îsa Derwîş, Ebûd Mihemed, Mihemed Elî, Riyad Hisên û Ebdulkerîm El-Hemade ji pêşiya meclisa navçeya Dirbêsiyê ber bi goristanê ve ketin rê.

Li goristanê merasîm bi rêzgirtin dest pê kir. Paşê Hevseroka kantona Hesekê Semer El-Ebdullah wiha axivî: "Welat bi têkoşîna şehîdan têne avakirin. Îro em 9 şehîdên xwe ku ji bo rizgarkirina herêmê û tevahî cîhanê ji DAIŞ`ê ya terorîst canê xwe feda kirin, oxir dikin."

Semer El-Ebdullah îşaret bi berxwedanî û lehengiya QSD`ê kir û ev tişt got: "Hêzên me careke din li hember xetertirîn rêxistina terorîst li cîhanê bi ser ket. Çeteyên DAIŞ`ê bi rêya êrişan xwestin jinûve xwe vejînin. Ev jî piştî binketina wan ji aliyê QSD`ê ve li baregeha dawî li Baxozê."

Semer El-Ebdullah diyar kir ku êriş komployek li dijî Bakur û Rojhilatê Sûriyê bû, aliyên derve weke dewleta Tirk beşdarî vê komployê bibûn û ev tişt anî ziman: "Dewleta Tirk alîgira sereke ya DAIŞ`ê ye. Lê hêzên me yên leşkerî şer kirin û têkoşiyan heta ku careke din DAIŞ`ê bi bin xist."

Hevserokê Desteya Hundirîn a Rêveberiya Xweseriya Demokratîk a Herêma Cizîrê Kenan Berekat jî ev tişt anî ziman: "Êrişa şaneyên DAIŞ`ê li ser girtîgeha Sînaa planeke mezin bû. Bi rêya wê dewleta Tirk xwest serkeftinên QSD`ê têk bibe û DAIŞ`ê jinûve vejîne da ku herêma Cizîrê bixe bin serweriya xwe de."

Kenan Berekat di axaftina xwe de îşaret bi berxwedana QSD`ê kir û wiha domand: "Bi saya têkoşîna 121 lehengî me cîhan ji hovîtiya çeteyên DAIŞ`ê ku destekê ji dewleta Tirk digrin, rizgar kir û careke din me pilanên wan têk bir."

Kenan Berekat diyar kir ku bi saya hevgirtin û hevkaria pêkhateyan komploya li dijî Bakur û Rojhilatê Sûriyê bin ket û wiha axivî: "Bi saya hevkariya pêkhateyan ku Ereban li Kêleka Kurd û Suryanan şer kir, me ewlehî û aramî careke din ji pêkhateyên herêmê re peyda kir."

Kenan Berekat soza paratina destkeftiyên Şoreşa Bakur û Rojhilatê Sûriyê ku bi saya têkoşîna pêkhateyên herêmê hatine bidestxistin da.

Paşê wesîqeta şehîdan ji aliyê endamê Saziya Malbatên Şehîdan Egîd Misto ve hate xwendin û radestî malbatên wan hate kirin. Di dawiyê de cenazeyên her 9 şehîdan di nava dirûşmeyên dilsoziya bi şehîdan re hatin veşartin

(bx)

ANHA