Serpêhatiya apê Osman a di Berxwedana Serdemê de

ARŞÎN NECAR / ŞEHBA

Di Berxwedana Serdemê ya 58 rojan de, gelê herêmê giyanê şoreşgerî li hember dagirkeran nîşan da. Biçûk, kal û pîr û jinan çek rakirin û bi serbilindî li hember balafirên dagirkeriyê sekinîn.

Malbata apê Osman Îbîş jî yek ji wan malbatên welatparêz e. Malbata apê Osman ji 10 endaman pêk tê û ji gundê Çeqmaqa Mezin ê girêdayî herêma Raco ya Efrînê ye. Heya 40 rojan li hember balafir û topbarana dagirkeriyê li gund li ber xwe dan.

Osman Îbîş 60 salî û bavê şehîdeke YPJ`ê ye. Apê Osman berxwedana destanî ya ku li rex şervanên YPJ û YPG`ê nîşan daye, wiha vedibêje: "Beriya ku êrîşên dagirkeriyê dest pê bikin, bi çend mehan me xwe li ser rêgezên jiyana şoreşgerî bi rêxistin kir. Me komîn ava kirin, komîteya parastinê aktîf kir û yek ji erkên me yên sereke, perwerdekirina şêniyan ji bo bikaranîna çekan bû."

Apê Osman dibêje ku perwerdeyên bikarnîna çekan roleke girîng di tevlêbûna şêniyan a di Berxwedana Serdemê de û sekinandina li hember êrîşan lîst.

Têkildarî êrîşên artêşa Tirk a dagirker û çeteyên wê li ser Efrînê di 20`ê Çileya 2018`an de apê Osman wiha got: "Tevahiya pêkhateyên Efrînê ji bo parastina xaka xwe li ber xwe da. Topbarana li ser gundê Çeqmaqa ya herî dijwar bû, ji ber ku nêzî sînor e. "

Piştî topbarana dijwar rewşa şêniyan trajedîk dibe, gelek ji wan neçar dimînin berê xwe bidin navenda kantonê. Lê apê Osman tevî malbata xwe li gund dimîne û li rex şervanan heya 40 rojan li ber xwe didin.  Di wê demê de apê Osman tevî malbata xwe piştgiriya şervanan dike û birîndaran dibin nuqteyên tenduristiyê li navçeya Mabatayê.

Têkildarî veguhestina birîndaran apê Osman diyar kir ku ji ber hedefgirtina balafirên artêşa Tirk a dagirker, erebeyên ku pê birîndar vediguhestin nuqteyên tenduristiyê, gelek zehmetî kişandin.

Ji aliyekî din ve apê Osman tevî 2 kurên xwe xwarin ji şervanan re peyda dikir û da ku bigihînin şervanan li eniyan zêdetirî 20 km dimeşîn. Tevî şehîdketina şervanan û birîndarbûna hinekan, lê apê Osman di mayîna li gund de bi israr bû.

Her wiha kurê apê Osman Mixlis Îbîş behsa rûdanên ku bi wan re qewimîne kir: "Min alîkariya bavê xwe di piştgiriya şervanan de dikir. Min hêz û cesareta xwe ji wî digirt û her çi qas rê dirêj bû, ez neditirsîm. Ji ber ku ez bi erka xwe radibûm, ew jî erka her şêniyeke Efrînê bû."

Piştî artêşa Tirk a dagirker û çeteyên wê kantona Efrînê dagir kir, apê Osman tevî malbata xwe mîna bi hezaran ji şêniyên Efrînê neçar dimînin ji Efrînê derkevin û berê xwe didin kantona Şehbayê. Niha apê Osman li navçeya Ehdasê bi cih bûye û di nav komîna taxa xwe de cih digire. Apê Osman  berdewamkirina berxwedanê û soza vegera Efrînê tekez dike.

(şx)

ANHA