Şêx êlên Girê Spî piştgiriya xwe bi QSD'ê re teqez kirin

GIRÊ SPÎ

Buroya Têkiliyên Giştî ya QSD'ê bi koordîneya Meclisa Kantona Girê Spî bi armanca şîrovekirina pêşketinên siyasî yên dawî îro bi şêx û rûspiyên êlên kantona Girê Spî re civiya.

Di civînê de cîgirê hevserokatiya Rêveberiya Xweser a Bakur û Rojhilatê Sûriyê Hemdan El-Ebid û endamê rêveber ê Buroya Têkiliyên Giştî yê QSD'ê Kanî Kobanê axivîn û geşedanên dawî li Sûriyê li ser her du astên siyasî û leşkerî ji beşdaran re şîrove kirin.

Girêdayî biryara vekişîna Amerîkayê ji Sûriyê, Kanî Kobanê û Hemdan El-Ebid tekez kirin ku ew biryar di şerê wan li hember terorê de tu ferq çênake û gelên herêmê xwedî xak in û dê dest jê bernedin.

Her duyan tekez kirin ku armanca Tirkiyê dagirkirina xaka Sûriyê ye û koçberkirina şêniyên wê ne.

Ji aliyê xwe ve, şêx û rûspiyên êlên kantonê destnîşan kirin ku ew bi xaka xwe ve ya ku bi saya xwîna şehîdan hatiye avdan girêdayî ne û diyar kirin ku ew ê li rex QSD'ê di xendekê de bisekinin.

Civîn bi avakirina 3 komîteyan bi dawî bû. Erka van komîteyan ew e ku bi şêniyên kantonê, gundewaran re bicivin û ji wan re pêşdeçûnên siyasî li herêmê şîrove bikin.

(şx)

ANHA