'Em di bin konekî de ne, lê dîsa jî ez kêfxweş im'

RUBA EL-ELÎ / REQA

Di dema serweriya DAIŞ'ê de li Sûriyeyê, çeteyan qanûn li şêniyên herêmê bi hemû pêkhateyên xwe ve ferz dikirin. Lê para herî mezin ji van qanûnan û binpêkirinan, a gelê Kurd bû.

Malbatên her du şêniyên Kobanê bi navê Mehmûd Muslêm û Xelîl Muslêm ji zêdetirî 20 salan ve li bakurê rojavayê gundewarên Reqayê li rex gelê Ereb bi cih bûbûn. Lê çeteyan bi zanabûn fitne û fesadî di navbera hemû pêkhateyên Reqayê de belav dikirin. 

Piştî rizgarkirina bajêr di 20'ê Cotmehê de ji çeteyên DAIŞ'ê ji hêla Hêzên Sûriyeya Demokratîk ve, aramî û ewlehî li bajêr serwer bû û bi hezaran şênî vegerîn malên xwe.

Ji malbatên ku çeteyan bi darê zorê ji Reqayê dane koçberkirin, malbatên Mehmûd Muslêm û Xelîl Muslêm in. Têkildarî mijarê Mehmûd Nuslêm ê 45 salî destnîşan kir ku ew zêdetirî 20 salan li gundê El-Tiwêla bi cih bûye. Mehmûd rêwîtiya koçberbûnê wiha vegot: "Piştî ku DAIŞ'ê Reqa dagir kir, çeteyan biryar da ku Kurdan ji Reqayê derxin û pêwîst e di 24 saetan de ji herêmê derkevin. Di heman demê de ji me xwestin ku em biçin bajarê Tedmûrê yê dorpêçkirî."

Mehmûd wiha domand: "Ji tirsa wan, di şevê de em reviyan Kobanê. Hindek hevalên me ji gelê Ereb alîkariya me kirin. Her wiha milk û malên me parastin da ku çeteyên DAIŞ'ê talan nekin. Piştî rizgarkirina bajêr, em vegeriyan. Cîranên me hemû milk û alavên malên me ji me re vegerandin."

Ji aliyê xwe ve Xelîl Mihemed Muslêm ê 38 salî û bavê 6 keçan û 2 kuran e diyar kir ku ew li Reqayê ji zêdetirî 20 salan ve bi cih bûye û wiha domand: "Çeteyên DAIŞ'ê bi girtina mêr û rejmkirina jinan sînordar nema lê belê milkên me desteser kirin û bi darê zorê em neçarî koçberkirinê kirin. Piştî rizgarkirinê ez vegeriyan mala xwe, lê ew hilweşiya bû."

Xelîl bi van gotinan dawî li axaftina xwe anî: "Piştî rizgarkirinê ez û malbatê xwe di bin konekî de ne. Lê dîsa jî ez bi vegera xwe kêfxweş im."

(şx)

ANHA