Bihabûna mazotê barê şêniyan giran kiriye

13`ê Îlonê hikumeta veguhêz mazot biha kir, berê lîtreyeke mazotê bi 12 hezar û 500 bû niha bûye 17 hezar û 500. Her wiha benzîn û gaz jî biha bûne. Piştî ku mazot biha bû êdî kel û pel, kirêyên rê û hwd jî biha bûn.

Demsala zivistanê nêz bû û şêniyan dest pê kiriye li çareseriyan digerin. Li şûna mazotê dixwazin daran bi kar bînin, dar jî biha bûne, berê tonek bi 100 dolarê Amerîkî bû niha bûye 250-350 dolar.

Rêveberiya Xweser her sal berî demsala zivistanê mazot li şêniyan belav dikir, her malbatekê 300 lître mazot werdigirt, lîtreyek bi hezar û 100 lîreyî bû.

Şêniyên bajarê Çilaxayê têkildarî mijarê axivîn.

Hecî Îyada Ebdo got: "Piştî ku mazot biha bû kel û pel jî biha bûn û em nema dikarin pêdiviyên xwe pêk bînin. Mûçeyê min tenê milyonek û 200 hezar e ez ê çawa mazota zivistanê bikirim û pêdiviyên malbata xwe pêk bînim, niha tenê betaniyên me hene û anceq em zivistana xwe bi betaniyan derbas bikin, ez nikarim mazotê bikirim."

Dura Seyîd Elî jî got pirsgirêka malbata wê ya aborî heye û wila lê zêde kir: "Mûçeyê hevjînê min tenê milyonek û 200 hezar e, têra me nake ku em pêdiviyên xwe yên du hefteyan bikirin, me amadekariya zivistanê nekiriye û em li bendê ne ku demsala pembû bi dawî bibe û em biçin şîvikên pembû berhev bikin, em nikarin bermîleke mazotê bi 3 milyon û 500 hezar lîreyî bikirin, an jî tonek dar bi 350 dolarî bikirin. Ez ê şîvikên pembû kom bikim û zivistanê xwe li ber sopa daran germ bikin."

Her wiha Hisên Rehîl ji bo rewşa xwe û malbata xwe got: “Em nikarin bi vê bihabûnê mazota zivistanê û daran bikirin, em ê zibilê kom bikin û xwe li ber germ bikin.”

(np)

ANHA