Şêniyên Girkê Legê: Dewleta Tirk tenê bedena Ocalan girtiye

RAPERÎN TEHLO / QAMIŞLO

Dewleta Tirk ji 2016'an ve tecrîdeke giran li ser Rêberê Gelê Kurd Abdullah Ocalan ferz dike û hevdîtinê bi parêzer û malbatê re qedexe dike.

Têkildarî mijarê hejmarek şêniyên navçeya Girkê Legê ji her du pêkhateyên Kurd û Ereb nerazîbûnên xwe bi rêya ajansa me anîn ziman.

Welatiyê bi navê Seîd Benefşî tecrîdkirin şermezar kir û wiha got: "Dewleta Tirk dê nikaribe bi ferzkirina tecrîdkirinê vîna gelê Kurd lawaz bike." Di berdewama axaftina xwe de Seîd destnîşan kir ku vîna gelên ku fikr û felsefeya Ocalan ji xwe re kirine bingeh ji çekên hikumeta dewleta Tirk bi hêztir e û wiha domand: "Bi saya fikr û felsefeya Rêber Ocalan gel xaka xwe parast."

Her wiha Seîd xuya kir ku dagirkera Tirk ji bo tunekirina projeya demokratîk û talankirina şaristaniya gelan, çeteyên DAIŞê şand Bakurê Sûriyeyê û wiha pê de çû: "Hevgirtina hemû pêkhateyên Bakurê Sûriyeyê planên Tirkiyeyê têk birin."

Di dawiyê de Seîd bang li rêxistinên hiqûqî kir ku mudaxele bikin û rewşa Ocalan aşkera bikin û wî serbest berdin.

Ji aliyê xwe ve welatiyê bi navê Salih El-Ehmed ji pêkhateya Ereb got: "Ocalan rêberek navneteweyî ye û kesayetek îstîsnayî ya fikra yekgirtî di navbera hemû pêkhateyên herêmê de. Her wiha El-Ehmed diyar kir ku dewleta Tirk tenê bedena Ocalan girtiye lê belê fikrên wî azad in.

Di dawiyê de El-Ehmed tekez kir ku Ocalan rêya rast a azadiyê û demokrasiyê ji bo gelên herêmê ronî kiriye û bang li rêxistinên navdewletî kir ku mudaxele bikin û çarenûsa Ocalan aşkera bikin.

Ji aliyê xwe ve welatiya bi navê Aqîde Elî tecrîdkirina ku dewleta Tirk li ser Ocalan ferz kiriye şermezar kir û bang li gelên herêmê kir ku li dijî siyaseta dewleta Tirk û ji bo aşkerakirina rewşa tenduristiya Ocalan serî hildin.

(şx)

ANHA