Cenazeyên şehîd Elî Hemadê û şehîd Mihemed El-Beşîr hatin oxirkirin

DÊRAZOR

Bi armanca oxirkirina cenazeyê şervanê QSD'ê şehîd Elî Hemadê (Ezam El-Sebha) û cenazeyê endamê Hêzên Ewlehiya Hundirîn Mihemed Beşîr El-Ewad ku dema erkên xwe yên leşkerî û parastinê pêk dianîn şehîd bûne, bi sedan welatiyan berê xwe da çerxerêya gundê El-Sebha.

Cenazeyên her du şehîdan bi alên QSD'ê û yên Hêzên Ewlehiya Hundirîn û bi kulîlkan hatin xemilandin. Welatiyan di merasîmê de dirûşmên dilsoziya bi şehîdan re berz kirin.

Girseya gel piştî ku cenazeyên her du şehîdan wergirtin bi dehan siwareyan di nava kolanên bajarokên El-Besîra û El-Sebha de geriyan û berê xwe da Goristana Şehîd Hanî El-Hesen. Piştî ku karwanê şehîdan gihaşt goristanê, merasîmek leşkerî ji aliyê hêzên ewlehiya hundirîn ve hate destpêkirin.

Endamê Hêzên Ewlehiya Hundirîn Umer El-Eseed piştî ku sersaxî ji malbatên her du şehîdan re xwest got ku bi saya fedekariya van şehîdan terora bi ser herêmê de hatiye şandin hate têkşikandin û soza şopandina rêya şehîdan da.

Di merasîmê de her wiha endama Saziya Malbatên Şehîdan Felek Mehmûd axivî û soz da dayikên şehîdan ku dê têkoşîna xwe li ser rêya azadiyê û ji bo peydakirina aramiyê ji welatiyên herêmê re berdewam bikin.

Piştî axaftinan belgeyên şehadeta her du şehîdan hatin xwendin û radestî malbatên şehîdan hatin kirin. Di dawiya merasîmê de cenazeyên her du şehîdan hatin spartin.

ANHA