Tevî êrişan şêniyên Ewn Dadat dev ji malên xwe bernadin

Dewleta Tirk a dagirker gundê Ewn Dadat ê kantona Minbicê topbaran kir û di encamê de zirarên mezin li milkên sivîlan hat lê dîsa jî gelê herêmê dev ji axa xwe bernade.

ROJANE

10 mijdar, 2024 11:14

MINBIC

Dewleta Tirk a dagirker û çeteyên her roj gundê Ew Dadat ê bakurê Minbicê topbaran dike, şeva înê tenê 45 top li gund û derdorê ketin.

Nûçegihanên me zirarên li malên şêniyan û zeviyên li dora gund bi kamereya xwe kişandin.

Her wiha deriyê Ewn Dadat ê di navbera Minbic û Cerablusê de hate topbarankirin û di enccamê de zirar li nuqteyên tenduristiyê yên ku xebatên xwe ji rêwiyan re pêşkêş dikin, bûn.

Şêniyê bi nave Elî El Hefnê yê ji gund behsa kêliyên topbaranê kir û got: "Saet 2:00 piştî nîvê şevê bû, top bi ser me de ketin. Kêliyên gelek bi tirs bûn. Me nizanî kengî dê mal bi ser serê me de hilweşe."

El Hefnê wiha domand: "Zarok hebûn û yek ji wan astengdar bû. Spasiya xwedê dikim ku tiştek bi kesekî nehat. Lê bi fikarim topbaran bandor li derûniya wan bike."

Her wiha El Hefnê îşaret bi zirarên di encama topbaranê de çêbûne kir û got: "Gelek beşên mala min û zeviya zeytûnan ku ev 25 sal in xizmeta wê dikim, zirar lê bûn. Lê dîsa jî em dev ji axa xwe bernadin."

Zarokê bi nave Mihemed El Ebdullah El Şêxo yê ji heman gundî wiha axivî: "Em di xew de bûn. Ji nişkan ve li ser dengê topan em şiyar bûn. Topek li mala me ket ji ber wê em çûn mala cîranan."

Mihemedê biçûk wiha pê de çû: "Ez naxwazim mala xwe berdim. Ev warê min e. Li vir xelk û dostê min hene. Ez naxwazin ji wan dûr kevim."

(şx/k)

ANHA