Şaredariya Gel sûkên li Şêxmeqsûd û Eşrefiyê vekirin

Bi armanca hêsankirina tevgera trafîk û çûn û hatinê, li ser gilî û bangên şêniyan Şaredariya Gel a taxên Şêxmeqsûd û Eşrefiyê yên Helebê 3 sûkên gel vekirin.

CIVAK Û JIYAN

28 sibat, 2025 07:15

HELEB

NESRÎN ŞÊXO

Şaredariya Gel a taxên Şêxmeqsûd û Eşrefiyê yên Helebê qadên fireh ji bo ku bike sûkên gele, li her du taxan veqetandin. Bi dehan erebaneyên ku bi awayekî bêserûber li nav kolanên her du taxan hatibûn danîn, di wan sûkan de hatin bicihkirin. Ev gav di encama gilî û bangên şêniyan û xwediyên wesayîtan de hat avêtin ku ji ber danîna bêserûber a erebaneyan tevgera trafîkê û ya çûn û hatinê dihat astengkirin.

Heta niha 3 sûkên gel hatine vekirin. Ji wan 2 li rojhilata taxa Şêxmeqsûd (yek li nêzî Parka Arîn Mîrkan û yek li nêzî Mizgefta Mezin e) û yek jî li taxa Eşrefiyê ye. Ji bo vekirina 2 sûkên din li taxa Eşrefiyê jî Şaredariya Gel di nava hewldanan de ye.

Şaredariyê diyar kir ku dê xizmetên sereke ji firoşkaran re bê pere peyda kirin, wekî av û kehrebeyê. Her wiha komîteyek ji firoşkaran hat avakirin da ku li ber kel û pelên xwe nobedê bigirin.

Endamê Şaredariya Gel endezyar Ednan Caro diyar kir ku ev gav di encama pêşniyarên şêniyan de hat avêtin û got: “Şaredarî ji bo birêxistinkirina rewşa her du taxan, nexasim piştî zêdebûna hejmara niştecihan, di nava hewldanan de ye. Me plan danî ku em sûkên nû li cihên guncaw û dûrî rêyên sereke amade bikin da ku tevgera çûn û hatinê neyê astengkirin.”

Caro diyar kir ku şaredarî ji bo vekirina 2 sûkên din li taxa Eşrefiyê dixebite ku bi vî awayî hejmara sûkên gel dibe 7.

Li taxên Şêxmeqsûd û Eşrefiyê 2 sûkên sereke hebûn û piştre bi ked û xebata şaredariyê ya ji bo pêşxistina rewşa jiyanî û rojane ya şêniyan, sûkên nû hatin vekirin.

(mh)

ANHA