Sempozyuma 5’an a Hunera Şêwekariyê dest pê kir

Îro, Sempozyuma 5’an a Hunera Şêwekariyê bi organîzekirina Desteya Çandê ya Herêma Bakur û Rojhilatê Sûriyeyê û hevkariya Desteya Çandê ya Tebqayê li Tebqayê dest pê kir. di sempozyumê de ji seranserî Sûriyeyê şêwekar beşdar bûn. Ev çalakî di çarçoveya hewldanên xurtkirina nirxên aştî û biratiyê di navber Sûriyeyiyan de û alîkariya derbaskirina bandorên şer û parçebûnê de pêk tê.

Sempozyum li hola navenda Çandê û Hunerê ya Tebqayê bi beşdariya hevserokên Meclisa Rêveber Evîn Siwêd û Hisên Osman, hevseroka KNK’ê Zeyenb Murad, nûnerên ji Meclisa Rêveber a kantona Tebqayê û endamên Desteya Çandê ya Rêveberiya Xweser û yên Tebqayê, nûnerên ji partiyên siyasî, Rêxistinên Civaka Sivîl, şêxên eşîran û girseya şêniyên Tebqayê, hat lidarxistin.

Destpêkê, hevseroka Desteya Çandê ya Rêveberiya Xweser Sifiraz Şerîf axivî û diyar kir ku ev sempozyum ji bo xêzkirina hêviyê di bin asîmana yekitiya Sûriyeyê de firsetek e. Şerîf anî ziman ku amadekariyên lidarxistina sempozyumê du meh dom kirin.

Di sempozyumê de, sînevîzyonek hat pêşkêşkirin ku bal kişand ser hewldanên çandê li herêmê ji bo vejandina mîrasa Sûriyeyê piştî hilweşandina wê bi destê rêxistinên DAIŞ’ê. Li kêlek wê jî tîma "Ecawîd Grûp" a Şano govendên pirrengiya çandê ya Sûriyeyê nîşan dide pêşkêş kirin, her wiha hunermend Sîpan Xelat jî stran gotin.

Piştî sînevîzyonek din li ser xebatên Desteya Çandê di par de pêk anîne, nemaze di aliyê parastina mîrasa dîrokî û xurtkirina hevgirtinê di nava civaka Sûriyeyê de, hat pêşkêşkriin.

Piştî hunermendên beşdar hatin nasandin, girse çû Kafîrteryaya Şemis. Li kafîterya şêwekar xebatên xwe yên ji bo sempozyumê dewam dikin.

Di sempozyumê de 31 şêwekarên ji bajarên Kobanê, Qamişlo, Hesekê, Minbic, Reqa, Şam, Quneytira, Laziqiye û Tebqayê beşdar in.

Sempozyum heta 6 rojan dom dike û bi pêşandana xebatên şêwekaran bi dawî dibe.

(fr)

ANHA