Rêveberiya Xweser a Tebqayê: Beşdarên Kongreya Diyaloga Nîştimanî nûnertiya kantonê nakin

Rêveberiya Xweseriya Demokratîk a Kantona Tebqayê îro der barê Kongreya Nîştimanî ya Sûriyeyê de daxuyaniyek da. Daxuyanî ji aliyê hevseroka Meclisa Gelan a Demokratîk Suas Oso ve hate xwendin.

Di daxuyaniyê de hate gotin: "Di demekê de ku gelê Sûriyeyê hêviyên xwe ji bo qonaxa nû hene da ku Sûriyeyeke piralî, demokratîk û nenavendî ava bibe, rêveberiya nû di birêvebirina qonaxa derbasbûnê de şaşî kirin. Ev jî dê bandoreke neyînî li siberoja Sûriyeyê bike."

Daxuyaniyê wiha berdewam kir: "Di van demên dawîn de komîteyek ji bo amadekirina Kongreya Nîştimanî hat avakirin û gelek civîn hatin lidarxistin, lê ev yek bû sedema hêrsa gelê Sûriyeyê û kir ku bi şik û guman li vê komîteyê binêrin ku nûnertiya hemû pêkhateyên Sûriyeyê nake.

Ev komîte û kongreyên yekalî ku tê de beşdariyeke rasteqîn a hemû pêkhateyan û partiyên siyasî, rêxistinên civaka sivîl, jin û ciwanan tune ye, dê têra daxwaz û vîna gelê Sûriyeyê ya ji bo jiyaneke azad û birûmet neke.”

Rêveberiyê di daxuyaniya xwe her wiha got: “Rêveberiya Xweser bang li Komîteya Diyaloga Nîştimanî kir ku bi pêkhateyên herêmên Bakur û Rojhilatê Sûriyê re diyalogê pêk bîne, lê vê komîteyê bi awayên xapînok çû bang li kesayetên ku ji bilî xwe nûnertiya tu kesî nakin û daxwazên gelê Sûriyeyê pêk naynin, kir. Em tekez dikin ku ne mimkun e ku hîmê demokrasiyê li ser encamên "Kongreya Diyaloga Nîştimanî" bê avakirin.”

Di dawiya daxuyaniyê de hate gotin: “Hemû aliyî beşdarî diyaloga niştimanî ya berfireh bibin. Em tevlîbûna kesayetên ku vîna gelên herêmên Bakur û Rojhilatê Sûriyê temsîl nakin red dikin, û em ji rêveberiya nû dixwazin ku bi berpirsyariya neteweyî nêzî vê pêvjoya hestiyar bibe û xwe radestî zextên dewleta Tirk ên li ser wê nebe. "

(k)