Panorama hefteyê: Riyad pêşniyara lidarxistina ˊkomîteya destûrêˊ ye

ˊPÊŞNİYARA KU TORA 9’AN A DESTÛRÊ Lİ RİYADÊ BEˊ 

Agahiyên di nûçeyê de ji dîplomatên li Şamê hatine wergirtine û wiha hate gotin: "Nûnerê taybet ê Neteweyên Yekbûyî yê ji bo Sûriyeyê Geir Pedersen, pêşniyar kiribû ku li paytexta Kenyayê Naîrobiyê civînên 9’emîn ên ’Komîteya Destûrî’ werin lidarxistin, lê Moskovê ev pêşniyar red kir. Moskov û hin dewletên Ereban li hev kiribû ku civîn li Bexdayê werin lidarxistin, lê ev pêşniyar jî ji aliyê Washingtonê ve hat redkirin."

Hate diyarkirin ku Pedersen serdana Şamê kiribû da ku wê îqna bike ku civînên "Komîteya Destûrî" li Cinêvê werin lidarxistin. Hate destnîşankirin ku Şam û Moskovê qebûl nekir civîn li Cinêvê werin lidarxistin ku wekî "devereke nebêalî" dinirxînin.

Di dewama nûçeyê de hate gotin: "Heman çavkaniyan destnîşan kir ku Pedersen di civînên xwe yên li Şamê de pêşniyara ku civînên ’Komîteya Destûrî’ li Riyadê pêk werin, kiribû û dibe ku ev pêşniyar pêk were.”

ˊKÊMASÎ Dİ TÊKİLİYÊN QAHÎRE Û ENQEREYÊ DE HENEˊ

Rojnameya El Ereb El Londoniye têkildarî têkiliyên Misir û Tirkiyeyê nûçeyek bi sernavê "Kêmasî di têkiliyên Qahîre û Enqereyê de hene" nûçeyek da.

Rojnameyê diyar kir ku koma Îxwan Muslimîn bi rêya dezgehên xwe yên çapemeniyê ku ji Tirkiyeyê weşanê dikin, careke din dest bi propagandaya li dijî Misirê kir, ruxmî ku Enqere hewl dide helwesteke redker li hember komê nîşan bide, nemaze ku beriya vê malperên wê girtin.

Rojnameyê di nûçeya xwe de diyar kir ku bi ji nû ve destpêkirina weşana kanalên koma Îxwanan ji Tirkiyeyê, guman li ser niyetên Tirkiyeyê çêkirin, nemaze ku vê dawiyê gelek kesên li ser wan kanalan derketine, li Misirê li dijî wan doz hene.

Li gorî rojnameyê ji vir diyar dibe ku têkiliyên di navbera her du welatan de wisa xuya dike ku di aliyê siyasî de bi pêş ketine, lê belê di rastiyê de tiştek wisa nîn e.

 ‘PROJEYA LIHEVKIRINEKE NEAŞKERAKIRÎ LI SER MASEYA ALIYÊN LEŞKERÎ YÊN SÛDANÊ YE’

Rojnameya El Quds El Erebî der barê geşedanên li Sûdanê de nûçeyek weşand. Li gorî nûçeyê "Aliyên leşkerî yên sûdanî civînên xwe yên neaşkerakirî didomînin. Mijara civînan projeya lihevkirina ji bo agirbestê û avakirina hikumeteke sivîl û artêşeke yekbûyî ye ku damezirandina wan 10 salan dewam bike."

Hate diyarkirin ku proje ji aliyê DYA, Erebistana Siûdî, Misir, Îmarat û dewletên din ve tê destekkirin û wiha hat domandin: "Proje mafê parêzbendiyê dide fermandarên artêşa Sûdanê, Hêzên Piştevaniya Lezgîn ku piştî malnişînbûnê dikarin xebata siyasî bikin û beşdarî hilbijartinên ku dê piştî avakirina hikumeta demkî ya yekemîn bên lidarxistin, bibin"