Mihemed Elî ku bi îşkenceyê hatibû şehîdkirin spartin axê

Şêniyên taxên Şêxmeqsûd û Eşrefiyê yên Helebê, cenazeyê şehîd Mihemed Elî ku di encama îşkenceya çeteyên dewleta Tirk de jiyana xwe ji dest dabû, spart axê.

ROJANE

9 kanûn, 2025 14:03

HELEB

Mihemed Elî ku ji bajarê Efrînê yê dagirkirî ye û bavê 3 zarokan e, di 1`ê Kanûna 2024`an de ji aliyê çeteyên dewleta Tirkiyeyê ve hat revandin û 42 rojan îşkenceyên hovane lê kirin. Tevî hemû hewldanên bijîşkan jî Mihemed Elî di 6`ê Kanûna 2025`an de şehîd bû.

Şêniyên taxên Şêxmeqsûd û Eşrefiyê îro cenazeyê şehîd Miemed Elî ji Nexweşxaneya Şehîd Xalid Fecir a li taxa Şêxmeqsûd wergirt û ber bi goristana li gundê Pino yê li herêma Şeqîfê ve bir.

Merasîm ji aliyê Tevgera Civaka Demokratîk (TEV-DEM) ve hat birêxistinkirin. Ji rêveberên Meclisa Olî Mihemed Qasim di merasîmê de axivî û diyar kir ku Mihemed Elî bi awayekî ku tu ol û wijdan qebûl nakin, rastî îşkenceyê hatiye. Qasim got: "Ev îşkenceya hovane, kîn û nefreta kûr a çeteyên Tirkiyeyê ya li hember Kurdan nîşan dide."

Piştî axaftinê cenazeyê şehîd li pakrewangeha şehîdan spartin axê.

(k)

ANHA