Li Reqa, Dêrazor û Tebqa çalakiyên 8'ê Adarê dest pê kirin

Li kantonên Reqa û Dêrazorê bi boneya nêzîkbûna Roja 8'ê Adarê çalakiyên çandî û ekolojî hatin lidarxistin. Di çalakiyan de bal li ser têkoşîna jinan û fedakariya wan a ji bo pêkanîna edalet û wekheviyê hat kişandin.

ROJANE

27 sibat, 2025 20:54

NAVENDA NÛÇEYAN

Di çarçoveya lidarxistina çalakiyên bi boneya nêzîkbûna Roja Jinan a Cîhanê (8'ê Adarê) de, li kantonên Reqa, Dêrazor û Tebqayê bi dirûşma "Bi felsefeya Jin Jiyan Azadî.. ber bi Sûriyeya demokratîk ve" çalakiyek hat lidarxistin.

Li kantona Reqayê endamên Meclisa Kombûna Jinan a Zenûbiya li ber wêneyên şehîdên şoreşa jinan wekî rêvebera kombûnê Kerem El Hemed a ku di êrişên dewleta Tirk a dagirker de li bendava Tişrînê şehîd bû, mûm pêxistin.

Kolan û qadên sereke yên bajêr jî bi pankartên xurtkirina mafên jinan û wekheviyê û bi rengan hatin xemilandin.

Li kantona Dêrazorê jinan bi çalakiyekê destkeftiyên jinan û rola wan a çalak pîroz kir û şehîd bi bîr anîn.

Di wê çarçoveyê de çerxerêya 7 Kîlo ya bajarê Dêrazorê hat xemilandin û wêneyên şehîdan hatin bilindkirin.

Jinan pankarteke mezin a silogana "Jin Jiyan Azadî.. ber bi Sûriyeya Demokratîk ve" li deriyê bajêr bilind kir.

Girêdayî wê jinan 50 şitilên daran li çerxerêya Şehîdan a herêma Meamil çandin.

Li kantona Tebqayê jî bi sedan malbatên şehîdan, dayikên aştiyê, endamên Meclisa Malbatên Şehîdan, koçberên Efrîn û Şehbayê, nûnerên Rêveberiya Xweseriya Demokratîk û deste û meclisên wê, Meclisa Kombûna Jinan a Zenûbiya û Meclisa Partiya Sûriya Pêşerojê beşdarî gelek çalakiyan bûn.

Koordînasyona Jinan a Rêveberiya Xweser a kantonê Qada Jina Azad li nêzî Bajarê Sporê yê bajarê Tebqayê vekir û wêneya şehîd Kerem El Hemed lê hat bilindkirin.

Ji bo zêdekirina şînkatiya nav bajêr jî çalakiya çandina 250 daran hat lidarxistin û pankartên "Bi feslefeya Jin, Jiyan, Azadî.. ber bi Sûriyeya demokratîk ve" li gelek dever û cihên nav bajarê Tebqayê hatin bilindkirin.

Meclisa Malbatên Şehîdan û Meclisa Kombûna Jinan a Zenûbiya bi beşdariya bi dehan malbatên şehîdan û dayikên aştiyê li ber wêneyên şehîdên bendava Tişrînê mûm pêxistin.

Rêvebera Meclisa Malbatên Şehîdan a kantona Şehbayê Nebîhe Şêxo şehêdên bendava Tişrînê bi bîr anîn û got: "Şoreşa jinan misogeriya avakirina civaka exlaqî, siyasî û demokratîk e."

(mh/fr)

ANHA

Reqa

Dêra zor

Tebqa