Konferansa Yekitiya Esnafan bi dawî bû

Konferansa damezirîner a Yekitiya Esnafan a bi dirûşma “Bi rêxistinkirina bazara civakî em civakeke demokratîk û azad ava bikin" li bajarê Hesekê yê kantona Cizîrê hat lidarxistin, bi dawî bû.

Di konferansê de nûnerên saziyên sivîl û leşkerî, partiyên siyasî û rêxistinên jinan, kesayetên olî, akademîsyen, nivîskar, hevseroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed û metranê Cizîr û Firatê ê Suryanên Ortodoks Mar Morîs Emsîh amade bûn.

Di konferansê de hevseroka Daîreya Têkiliyên Derve ya Rêveberiya Xweseriya Demokratîk a Herêma Bakru û Rojhilatê Sûriyeyê Îlham Ehmed, hevserokê TEV-DEMˊê Ebduselam Mehmûd û hevseroka Konfedraliya Rêxistinên Civaka Demokratîk Nesrîn axivîn.

Dûre rapora 2 salan a yekitiyê hat xwendin, nîqaşên der barê rêziknameyê de, çawaniya pêşxistina yekitiyê hatin kirin.

Piştî erêkirina li ser rêziknameyê, hilbijartinên hevserokatiyê û meclisa giştî hatin kirin. Nezhan Mehmûd û Fikret Xelîl Ebdealo bûn hevserok û 10 endam ji bo Meclisa Giştî hatin hilbijartin.

Di dawiya nîqaşan de encanameyek hat dayîn û wiha ye:

Birêxistinkirina bazara xwecihî li gorî komîte û beşan ji komînan bigire heta bi kantonan.

Piştgiriya jin û ciwanan di pêşxistina beşdarî, avakirina aborî, geşepêşdan û pêkanîna xwetêrkirinê de.

Belavkirina çanda hişyarî û bexişandinê di nava tevahî civakê de.

Xebitîna li ser projeyên aborî yên dikevin xizmetî gel.

Temsîlkirina yekitiyê li pêş aliyên eleqedar ji bo misogeriya mafên karkeran û parastina wan.

Xebitîna li ser avakirina têkiliyên dîplomasî yên civakî di hundirê Sûriyeyê û derveyî wê de.

(fr)

ANHA