‛Karker leşkerên veşartî yên avakirin û pêşxistina civakê ne’

Yekitiya Kedkaran a Herêma Bakur û Rojhilatê Sûriyeyê bi dirûşma “Bi banga Aştî û Civaka Demokratîk werin em bi hev re 1’ê Gulanê pîroz bikin” şahiyek li Daristana Bendava Mizgeft a bakurê rojhilatê bajarê Tirbespiyê li dar xist.

Di şahiyê de şêniyên bajarên Qamişlo, Amûdê, Tirbespiyê û Til Hemîs ên kantona Cizîrê beşdar bûn.

Di şahiyê de hevserokê Yekitiya Kedkaran a Herêma Bakur û Rojhilatê Sûriyeyê Şêro Şero 1'ê Gulanê li hemû karkeran û Rêber Abdullah Ocalan pîroz kir.

Şero soza domandina xebatê ji bo avakirina Sûriyeya demokratîk a nenavendî ku di nav xwe de hemû pêkhateyên Sûriyeyê bihewîne, dubare kir.

Hevseroka Meclisa Rêveber a kantona Vîvan Beho got: "Parastin û misogerkirina mafên karkeran armancên sereke yên Rêveberiya Xweseriya Demokratîk in, ji ber ku karkerên leşkerên veşartî yên avakirin û pêşxistina civakê ne."

Vîvan di berdewama axaftina xwe de ev tişt anî ziman: "Dest bi dest em ê civaka demokratîk a azad ava bikin û em ê heta pêkanîna armanc û hêviyên gel li ser vê rêyê bin."

Piştre koma Botan, koma Agirî û hunermend Newroz stran pêşkêş kirin.

Di şahiyê de hunermend Lawîn Seîd, koma Rêwan a govendê û koma Şehîd Saknîne ya şanoyê hunerên xwe pêşkêş kirin.

Di dawiya şahiyê de hunermend Mehmûd Osman, hunermend Mueyed Şiwêş, koma şehîd Xebat û hunermend Îmad Silêman stran pêşkêş kirin û şahî bi gerandina govendan bi dawî bû.

(mh)

ANHA