HRRK kongreya xwe ya 10’emîn li dar dixe

Hevgirtina Rewşenbîrên Rojavayê Kurdistanê (HRRK) bi dirûşma “Dilsoziya bi giyanê nemir Ehmed Huseynî re" kongreya xwe ya 10`emîn li navenda xwe ya bajarê Qamişloyê li dar dixe.

Kongre bi beşdariya endamên HRRK’ê, nivîskar û rewşenbîran bi deqeyeke rêzgirtinê dest pê kir. Piştî wê endamê komîteya amadekar nivîskar Kemal Necim axivî. Necim di destpêka axaftina xwe de xêrhatina beşdaran kir û têkildarî xebatên HRRK‘ê yên ji sala 2014`an ve agahî da.

Kemal Necim got ev kongreya yekemîn e ku bêyî nivîskar û helbestvan Ehmed Huseynî tê lidarxistin û ji bo rewşenbîran jî anî ziman ku ew di vê pêvajoyê de berpirsyar in û divê çand û hebûna gelê Kurd biparêzin. Necim destnîşan kir ku hêza rewşenbîran heye ku berpirsyariyê rakin.

Piştî wê bi navê HRRK‘ê Anahîta Sîno jî li ser jiyana Ehmed Huseynî axivî û têkoşîna wî ya ji bo parastina çand û hebûna gelê Kurd bi bîr xist. Anahîta Sîno anî ziman ku ew ê rêça helbestvan Ehmed Huseynî biparêzin û got: "Divê wênesaz, nivîskar û helbestvanan û tevahî saziyên çandî xebatên xwe firehtir bikin û çanda gelê Kurd pêşbixînin û biparêzin."

Piştî axaftinan peyamên pîrozbahiya kongreyê hatin xwendin. Li ser xebatên HRRK‘ê jî sînevîzyon hate pêşandan.

Li gorî komîteya amadekar, dê rapora HRRK‘ê were xwendin, xebatên 2 salan werin nirxandin, komîteyeke nû were hilbijartin û herî dawî daxuyanî were dayîn.

(np)

ANHA