Hevrêyên me Cîhan û Nazim jî di nav de 5 şehîd hatin oxirkirin

Bi hezaran ji pêkhateyên bajarê Qamişloyê û rojnamevan cenazeyên nûçegihana ajansa me Cîhan Bîlgîn û rojnamevan Nazim Daştan ku 19’ê Kanûna 2024’an di encama bombebarana balafirên bêmirov dewleta Tirk a dagirekr li ser rêya Sirînê de şehîd bibûn û şervana YPJ`ê  Avzem Çiya (Tulay Mihemed) û şervanên Hêzên Komandos Diyar Qamişlo (Bîlal Îbrahîm) û  Diyar Qamişlo, Luqman El Xemîs (Şam Qamişlo) yên ku di 2`ê Çileyê di berxwedana Bendava Tişrînê de şehîd bûbûn, li Goristana Şehîd Delîl Saruxan a li bajarê Qamişlo bi merasîmekê oxir kirin.

Merasîm bi deqeyeke rêzgirtinê dest pê kir, piştre endama Meclisa Malbatên Şehîdan a kantona Cizîrê Şemsîxan Gulo axivî û diyar kir ku îro encama ramana Rêber Abdullah Ocalan di şerê gel ê şoreşgerî û berxwedana lehengî û hevgirtina gel a bi hêzên leşkerî re diyar dibe.

Şemsîxan wiha dewam kir, "Em îro şehîdên ku destanên qehremanî nivîsandine oxir dikin, çi li eniyên şer û çi jî di nava xebatên ragihandinê de ku ji bo ragihandina rastiya şoreşa gelên Bakur û Rojhilatê Sûriyeyê canê xwe feda kirine. Em ji bo wan soza berdewamkirina têkoşînê û pêkanîna hemû armancên şoreşê didin. "

Li ser navê Meclisa Leşkerî ya bajarê Qamişlo endamê meclisê Nezîr Sofî axaftinek kir û destnîşan kir ku Hêzên Sûriyeya Demokratîk bi her şehîdekî re soza berdewamkirina têkoşînê û parastina destkeftiyên şoreşê nû dike.

Endamê Kongreya Îslama Demokratîk Mihemed El Zaxuranî jî di merasîmê de axivî û got ku rumeta herî mezin a jiyanê şehîdbûn e "îro xort û keçên welat bi fedakirina canê xwe digihêjin vê rumetê, ji bo parastina welat û gelê xwe. "

ˈKAMERA Û PÊNÛSÊN ME DÊ RASTIYA GELÊ ME BIGIHÎNIN HEMÛ CÎHANÊˈ

Li ser navê Yekitiya Ragihandina Azad endamê Rêveberiya Ajansa Hawarê Ekrem Berekat axixî û diyar kir ku gelên herêmên Bakur û Rojhilatê Sûriyeyê 14 sal in şehîdan didin û berdêlên mezin didin û bi saya van fedakariyan karîbû civakeke azad, demokratîk ava bike û nirx û exlaqê civakê biparêze.

Her wiha destnîşan kir ku Yekitiya Ragihandina Azad gihandina rastiya vê şoreşê girte ser xwe û di vê rêyê de gelek şehîd dan, "Em îro li vir soza xwe ya bi şehîdên ragihandinê re nû dikin, ku bi kamera û pênûsên wan dê rastî, fedakarî û lehengiya gelê xwe bigihêjin hemû cîhanê. "

Piştî axaftinan belgenameyên şehîdan hatin xwendin û rasdestî malbatên wan hatin kirin.

Cenazeyên şehîdan Avzem Ciya, Diyar Qamişlo û Şam Qamişlo li Goristana Şehîd Delîl Saroxan spartin axê.

Li ser daxwaza malbatên her du şehîdan, Cîhan Bîlgîn û Nazim Daştan, dê cenazeyên wan bibin Bakurê Kurdistanê û li wir bispêrin axê.

(k)