Bi çalakiyên cihêreng 8’ê Adarê li gelek bajaran hat pîrozkirin

Di çarçoveya çalakiyên 8’ê Adarê yên bi dirûşma "Bi Jin, Jiyan, Azadî ber bi Sûriya demokratîk ve" tên lidarxistin de, rêzeçalakî li kantonên Cizîr û Firatê û bajarê Helebê hatin organîzekirin.

ÇILAXA

Şandeyeke Kongra Star û Nivîsgeha Jinan a Şaredariya Gel a bajarê Çilaxa serdana saziyên sivîl û yên xizmetguzarî, meclisa bajêr, malbatên şehîdan û navendên hêzên leşkerî kir û 8'ê Adarê li wan pîroz kir. Bi heman boneyê jî li bajêr daran hatin çandin.

Di serî de şandeyê serdana rêbendên kontrolê yên hêzên ewlekariyê kir û dar li derdora rêbendan jî çandin.

Piştre şandeyê berê xwe da saziyên ewlekarî û leşkerî yên bajêrû gul û kovara "Aso" li endaman belav kirin û li qadên saziyan dar û gul çandin.

Di dawiya serdanê de şandeyê serdana Meclisa Bajarê Çilaxa û Şaredariya Gel kir û li wir bi peyamekê girîngî bi bilindkirina asta têkoşînê hat dayîn.

DÊRIK

Kongra Star a Dêrikê li Navenda Çand û Hunerê ya Dîcle ya bajêr semînerek da. Di semînerê de bi dehan endamên rêxistinên jinan beşdar bûn.

Di semînerê de hat diyarkirin ku asta ku jinên Herêma Bakur û Rojhilatê Sûriyeyê gihîştiyê bi saya şopandina fikrên Rêber Abdullah Ocalan e.

Di dawiya semînerê de beşdaran teqezî bi girîngiya parastina destkeftiyên jinan û domandina têkoşînê li ser şopa fikrên Rêber Abdullah Ocalan, da.

Piştre şanoger Nejbîr Xanim şanoyek li ser zehmetiyên jinan û têkoşîna wan a ji bo pêkanîna edalet û wekheviyê pêşkêş kir.

QAMIŞLO

Meclisa Jinan a Partiya Sûriya Pêşerojê paneleke diyalogê li navenda Nêrgiz a bajarê Qamişlo li dar xist. Di panelê de rêvebera meclisê Welîde Îsmaîl 8'ê Adarê li jinên berxwedêr û têkoşer pîroz kir.

Piştre berdevka meclisê Wedîde Hesen û cîgira wê Sumeye El Kîret li ser destkeftiyên jinên Herêma Bakur û Rojhilatê Sûriyeyê axivîn.

Beşdaran destnîşan kir ku jinên herêmê bi saya fikrên Rêber Abdullah Ocalan xwe di hemû qadan de îsbat kir û cihê xwe tê de girt.

KOBANÊ

Koordînasyona Jinan a Rêveberiya Xweseriya Demokratîk a kantona Firatê civîneke girseyî bi dirûşma "Jin Jiyan Azadî ber bi Sûriya demokratîk ve" li parka Ronî War a bajarê Kobanê li dar xist. Di çalakiyê de dar hatin çandin û biroşorên têkoşîna dijî tundiya li ser jinan ku ji aliyê rêxistina Sara ve hatibûn amadekirin, hatin belavkirin.

Di civînê de hevseroka Desteya Jîngehê ya kantonê Almas Romî li ser girîngiya 8'ê Adarê di dîroka têkoşîna jinan a li dijî hişmendiya baviksalariyê de, axivî.

Almas anî ziman ku jinên li Bakur û Rojhilatê Sûriyeyê bi saya fikrên Rêber Abdullah Ocalan gavên mezin ber bi azadiyê ve avêtin û îro jinên herêmê bûn sembola têkoşînê û xwe di tevahî aliyan de îsbat kir.

HELEB

Tevger û rêxistinên jinan ên taxên Şêxmeqsûd û Eşrefiyê yên bajarê Helebê pêşangeheke folklorî vekir, meşek û 2 civînên girseyî li dar xistin.

Weqfa Jina Azad di hola 8'ê Adarê de berhem û amûrên destkariyê yên ku berê jinan ji bo dirûtin û xwarinçêkirinê bi kar dianîn, cil û bergên gelêrî, xişir, şalên bineqş û tabloyên li ser jinên têkoşer pêşkêş kirin.

Di pêşangehê de endam û nûnerên saziyên sivîl, komîn, meclis, tevger û rêxistinên jinan beşdar bûn.

Girêdayî wê, Meclisa Jinan a Meclisa Malbatên Şehîdan civînek li hola Telêt Heleb a rojhilatê taxa Şêxmeqsûd li dar xist. Di civînê de nûnerên partiyên siyasî û rêxistinên jinan beşdar bûn.

Di civînê de berxwedana jinên ên li bendava Tişrînê hat silavkirin.

Rêvebera Meclisa Malbatên Şehîdan Zinarîn Efrîn got jin ji bo misogerkirina azadiya xwe bi bijarteya têkoşînê ve girêdayî ne.

Zinarîn berxwedana jinên têkoşer û çalakger ên li Bendava Tişrînê ruxmî astengî û zemetiyan silav kir û got jinê hêza xwe ya têkoşînê ji fikrên Rêber Abdullah Ocalan wergirtiye.

Di dawiya çalakiyê de gul û biroşorên têkildarî gotinên Rêber Abdullah Ocalan ên li ser jinan li beşdaran hatin belavkirin.

Girêdayî heman mijarê, Nivîsgeha Têkiliyan a Kongra Star bi jinên pêkhateya xiristiyanî re li dêra li rojhilatê taxa Şêxmeqsûdê, civiya.

Di serî de sedemên diyarkirina roja 8'ê Adarê wekî Roja Jinan a Cîhanê hatin şîrovekirin.

Yekitiya Jinên Ciwan a Helebê jî bi heman boneyê meşek li pêşiya sûka gelêrî ya rojhilatê taxa Şêxmeqsûd li dar xist.

Di meşê de jinên ciwan û xwendekar beşdar bûn.

Meş ber bi çerxerêya şehîd Destîna ya heman taxê ve bi rê ket. Li wir rêvebera Meclisa Ciwanên Şoreşger a Sûriyê Zeyneb Ebdo li ser rola sereke ya jinan di pêşengtiya şoreşan û biserxistina wan de, axivî.

(mh/fr)

ANHA