Amerîka firotina balafirên F-35 bo Erebistana Siûdî pejirand

Di paketa firotinê de li gel 48 balafirên şer ên F-35 her wiha 49 motorên Pratt & Whitney, amûrên ragihandin, parçeyên cihgir û xizmetên piştevaniya teknîkî jî hene. Wezareta Karên Derve ya Dewletên Yekbûyî yên Amerîkayê (DYA) îdîa kir ku ev firotin wê hevsengiyên leşkerî yên li herêmê neguherîne.

Riyadê ev peyman bi kêfxweşî pêşwazî kir. Sefaretxaneya Bilind a Erebistana Siûdî ya li Washingtonê ragihand ku firotina F-35 hêza hevkariya parastinaê ya stratejîk a navbera herdu welatan nîşan daye.

Erebistana Siûdî demeke dirêj e ku dixwaze balafirên şer ên F-35 bikire. Lê belê Îsraîl ku yekane welat e ku li herêmê van balafiran bi kar tîne, beriyaniha fikarên xwe yên li ser mijara firotinê parve kiribû. Di çarçoveya polîtîkaya DYA’yê de ku demeke dirêj e dimeşîne, divê Îsraîl li herêmê li ser hevrikên xwe yên gengaz ji aliyê leşkerî ve serwer be.

Wezareta Karên Derve ya DYA’yê ragihand ku firotin wê kapasîteya parastina Erebistana Siûdî ya di operasyonên hewa-hewa û hewa-bejahî de zêde bike, lê hevsengiya leşkerî ya herêmî neguherîne.

Yek ji sernavên girîng ên nîqaşa li Kongreya DYA ew e ku teknolojiya F-35 karibe bikeve destê Çînê. Li gorî New York Timesê hin analîstên li îstîxbarata DYA’yê, di ser hevkariya navbera Riyad û Pekînê mijar xistine rojevê ku Çîn karibe xwe bigihîne tekonolojiya pêşketî ya balafirê.

Endamê Komîteya Îstîxbaratê ya Meclîsa Nûneran a DYA’yê Raja Krishnamoorthi yê Demokrat li ber vê firotinê rabû û bal kişand ser hişyariyên saziyên îstîxbaratê yên li ser Çînê. F-35 heta niha bi giranî ji hevalbendên nêz ên DYA’yê, ji Îsraîlê û hin welatên NATO’yê re hatiye firotin. Tirkiye jî ji ber ku sîstema parastina hewayî ya S-400 ji Rûsyayê kirî, di sala 2019’an de ji bernameya F-35 hatibû derxistin.

Mijara firotina F-35 ji bo Erebistana Siûdî di demeke welê de kete rojevê ku şerê li Rojhilata Navîn hîn bêhtir bandorê li Erebistana Siûdî dike.