Li Helebê komploya navneteweyî hate şermezarkirin

Bi boneya salvegera 26′an a destpêkirina komploya navneteweyî ya di 9′ê Cotmeha 1998′an de li dijî Rêber Abdullah Ocalan dest pê kiriye û di 15′ê Sibata 1999′an de dîl hate girtin, tevger û rêxistinên jinan (Tevgera Hîlala Zêrîn, Kongra Star, Navenda Lêkolînên Jineolojiyê û Yekitiya Jinên Ciwan) çalakiya konvedanê li taxa Eşrefiyê ya Helebê li dar xist.

Kon li Parka Efrîn a taxê hate vedan, di roja yekemîn de şandeyên ji Meclisa Giştî ya taxên Şêxmeqsûd û Eşrefiyê, meclis û komînên her du taxan, partiya siyasî, HPC′ê, Hêzên Ewlekariya Hundirîn û dayikên bi Rêber Abdullah Ocalan re civînê beşdar bûn.

Wêneyên Rêber Abdullah Ocalan, wêneyên şehîdan di bin kon de hatin daliqandin, her wiha cihek ji pirtûkên Rêber Abdullah Ocalan re û alavên mîrasa herêmê hate veqetandin.

Çalakî bi axaftina Kongra Star dest pê kir û dê piştre Meclisa Giştî ya taxên Şêxmeqsûd û Eşrefiyê biaxive û dûre endama Kongra Star Fatme Hesen çîrokên li ser jiyana Rêber Abdullah Ocalan vebêje û sînevîzyonek li ser berxwedana Rêber Abdullah Ocalan were pêşandan.

Çaverê ye ku çalakî 2 rojan heta saet 18:00′an dewam bike. Çalakî dê bi meşekê ji aliyê Tevgera Ciwanên Şoreşger ve bi dawî bibe.

Dê kon 48 saetan vekirî be û dê endam, tevger û rêxistinên jinan bi cilên xwe yên folklorî nobetdariyê bigirin.

(fr)

ANHA