Cenazeyê şehîd Zîn Sekvan bi merasîmekê hat veşartin

Şervana Hêzên Rizgariya Efrînê (HRE) Roşîn Elî (Zîn Sekvan) 18′ê Tebaxê di encama êrişeke dewleta Tirk a dagirker de di çaroveya qonaxa duyemîn a Berxwedana Serdemê de şehîd bûbû.

Bi sedan şêniyên herêma Firatê cenazeyê şehîd Zîn Sekvan bi merasîmekê li Goristana Şehîd Dicle ya Kobanê spart axê

Di merasîmê de hevseroka Meclisa Malbatên Şehîdan a Herêma Firatê Ayşe Efendî axivî û wiha got: "Xewna malbata şehîd Zîn ew bû Zîn weke şervanekê parastina 4 parçeyên Kurdistanê û gelê herêmê bike.  Ev xewn li xaka Efrînê ya dagirkirî pêk hat."

Ayşe soz da ku ew ê heta dilop dawîn a xwînê li hemberî hewlanên dagirkirina herêmê û xirabkirina ewlehiyê bisekinin.

Hevseroka Meclisa Malbatên Şehîdan a Herêma Efrînê Xedîce Îbo anî ziman ku ew deyndarê vê xakê ne ku şehîdên mîna şehîd Zîn anîne û got: "Em ê bi şev û roj bixebitin heta Efrîna dagirkirî rizgar bikin."

Xedîce peyamek dan piştevanên dewleta Tirk a dagirker û wiha pê de çû: "Em ne teror in, em xwediyê xakê ne. Ew teror in. Wan zarokên me ser jê kirin, malên me wêran kirin û îro xaka me dagir dikin."

Rêveberê Meclisa Ciwanan a PYD'ê ê ya Herêma Firatê Mistefa Sedîq wiha got: "Şehîd heqîqeta me ne. Em dev ji destkeftiyên şehîdên xwe bernadin. Em ê Efrînê rizgar bikin, em xwediyên fikir û fesefeya Rêbertî ne. Vê felsefeyê em fêrî kirine ku divê em dev ji xaka xwe bernedin."

Sedîq wiha domand: "Em pişta xwe nadin kesekî. Şehîdên me hêzên me ne. Em ê di oxira rizgarkirina herêmên dagirkirî de rihê xwe bidin. Divê gelê herêmê bi propagandayên dijmin nexapin."  

Xwişka şehîd Zîn, Yasmîn Elî jî soz da ku ew ê li ser şopa xwişka xwe bimeşe heta aştî li herêmê pêk tê û gel bi ewle dijî.

Piştî axaftinan, wesîqeya şehîd Zîn Sekvan hate xwendin û radestî malbatên hate kirin. Cenazeyê şehîd Zîn bi dirûşmên "Şehîd namirin" û tilîliyên dayikan hat veşartin.

(fr)

ANHA