​​​​​​​Hiqûqnas El Îbrahîm: CPT beşeka Komploya Navneteweyî ye

Desthilata dewleta Tirk tecrîda girankirî ya li ser Rêber Abdullah Ocalan didomîne. Li hemberî vê tecrîdê ku li dijî qanûn û peymanên navneteweyî ye, rêxistinên hiqûqî û mirovî bê deng in.

Der barê mijarê de, hiqûqnas Şadî El Îbrahîm got: "Piştî serdana dawîn a Komîteya Pêşîgirtina li Îşkenceyê (CPT) ji girtîgeha Îmraliyê re tu daxuyanî û agahî der barê rewşa girtîgehê de nehatin parvekirin. Ev yek dide nîşandan ku rewşa li girtîgehê cidî û xeternak e. Ji ber vê yekê wekî gelê ku projeya neteweya demokratîk û fikr û felsefeya Rêber Abdullah Ocalan pêk tîne, ev rewş ji bo me fikaran çêdike."

Şadî El Îbrahîm destnîşan kir ku daxuyaniyên CPTʹyê yên têkildarî girtîgeha Îmraliyê nakok in û wiha domand: "CPTʹyê der barê doza Rêber Abdullah Ocalan de berpirsyariyên xwe bi cih nayîne. Gelê Kurd û hêzên demokrat ji karê vê saziyê ku îdiaya parastina mafên girtiyan dike, bi şik in. CPT bi rêbazên qanûnî û exlaqî nêzî girtîgeha Îmraliyê nabe."

Hiqûqnas Şadî El Îbrahîm destnîşan kir ku CPT li gorî siyaset û berjewendiyên hêzên serdest û desthilata Erdogan kar dike û erkên xwe der barê Rêber Abdullah Ocalan de bi cih nayne.

El Îbrahîm diyar kir ku CPT beşeke Komploya Navneteweyî ye û ji bo razîkirina hêzên serdest qanûn û pîvanên xwe binpê dike û got: "Di qanun û peymanên navneteweyî û biryarên Dadgeha Mafên Mirovan a Ewropayê de tiştek bi navê girtina navneteweyî tune ye. CPT saziyeke ku ji şopandina rewşa li girtîgehên Tirkiyeyê berpirsyar e."

Hiqûqnas Şadî El Îbrahîm di dawiya axaftina xwe de got: "Ji bo pêkanîna azadiya fîzîkî ya Rêbertî em ê bi hemû enerjiya xwe kar bikin. Wek parêzer em ê têkoşîneke qanûnî pêk bînin, ji ber ku CPTʹyê heta niha tu gavên cidî der barê vê mijarê de neavêtine."

(bb)

ANHA