Ji ber êrişa Îsraîlê balafirgeha Helebê ji xizmetê derket

Medyayên hikumeta Şamê li ser zimanê çavkaniyekî leşkerî ragihand ku duh saet di 11:35ʹan de Îsraîlê bi moşekan balafirgeha Helebê û hinek nuqteyên din ên derdora Helebê topbaran kirin.

Heman çavkanî diyar kir ku di encama êrişê de leşkerekî hikumeta Şamê hat kuştin, 5 leşker û 2 sivîl jî birîndar bûn, her wiha ziyanên madî çêbûn û balafirgeha Navneteweyî ya Helebê ji xizmetê derket.

Navenda Çavdêriya Mafên Mirovan a Sûriyeyê (SHOR) jî ragihand ku di encama êrişa Îsraîlê de teqîn di depoyeke çekan de çêbû, ziyan gihaştin balafirgeha Neyreb a Leşkerî û Balafirgeha Navneteweyî ya Helebê bi awayekî demkî ji xizmetê derket.

SOHR, diyar kir ku moşekên Îsrîalê li kargehên parastinê yên herêma Sifêra ya gundewrê Helebê ketin û ziyanên madî çêbûn.

Ev êriş saetek beriya civîna pêncalî ya erebî ya têkildarî Sûriyeyê û rojekê beriya serdana serokkomarê Îranê ji bo Sûriyeyê hat kirin. Tê payîn ku serokkomarê Îranê li Helebê jî bigire.

Di 29ʹyê Nîsana borî de  Îsraîlê bi moşekan depoyeke çekan a Hizbullah a Lubnanê ya li balafirgeh Debaa ya leşkerî ya gundewarê Humisê topbaran kir. Di encamê de depo û kamyonên barhilgirên çekan bi temamî hilweşiyan.

Li gorî  Jerusalem Post a Îsraîlê, Îran qaçaxçîtiya çekan bi rêya balafirgeha Helebê ji bo Hizbullah zêde kiriye.

(bb)