​​​​​​​Li Kobanê û Minbicê xwepêşandanên li dijî êrişên dagirkeriyê

Bi hezaran şêniyên herêma Firatê, endamên saziyan û nûnerên partiyan li Qada Jina Azad a li Kobanê kom bûn, piştgiriya xwe ya bi gerîla re rave kir, êrişa dewleta Tirk a dagirker a li dijî wan û xiyaneta Partiya Demokrat a Kurdistanê (PDK) şermezar kirin.

Dayikên şehîdên HPG`ê li pêşiya xwepêşandanê cih girt û heta Qada Şehîd Egîd meşiyan.

Li Qada Şehîd Egîd xwepêşandan veguherî mîtîngê. Di mîtîngê de hevseroka Meclisa Malbatên Şehîdan a Herêma Firatê Eyşe Efendî axivî û kiryarên PDK`ê şermezar kirin û berxwedana gerîla silav kir.

Eyşe Efendî wiha domand: “Ev gelê berxwedêr, careke din îsbat kir ku hemû cureyên xiyanetê red dike û li dijî şerê birakujiyê ye.”

Eyşe Efendî daxuyand ku PDK`ê rûyê xwe eşkere kir û xiyanet bi xwîna şehîdan kir û got: “Hûn ê bi ser nekevin. Dîrokê dê we efû neke. Hûn çi dikin bikin, lê hûn nikarin vîna me têk bibin.”

Eyşe Efendî di dawiyê de got: “Dewletên mezin ku çarenûsa gelan kontrol dikin, plan dikin û PDK`ê planên wan pêk tîne. Em ê piştgiriya gerîla bikin û em ê layîqî fedakariyên wan û şehîdan bin.”

MINBIC

Li Minbicê bi heman mebestê, şêniyên bajêr, endamên saziyan û komîteyên girêdayî Rêveberiya Sivîl a Demokratîk, saziyên taybet ên jinan û nûnerên partiyan li kolanan bûn.

Xwepêşandana li Minbicê ji pêşiya navenda Tevgera Ciwanên Şoreşger dest pê kir û li Çerxerêya Mîzan rawestiya. Di çalakiya li wir de, hevserokê Tevgera Ciwanên Şoreşger a Minbicê Ehmed El-Cemîlî axivî û got: “Em xwîna şehîdên xwe yên azad ji bîr nakin ku ji bo rizgarkirina Minbicê ji terorê canê xwe feda kir.”

El-Cemîlî got ew ê piştgiriya gerîla bikin ku li hember êrişên dewleta Tirk a dagirker û PDK`ê li ber xwe didin.

(şx)

ANHA