Meclisa Rêveber projeyên îsal nîqaş kirin

Civîn li hola avahiya civînan a Meclisa Rêveber a Rêveberiya Xweser a bajarê Reqayê bi beşdariya hevserokatiya Meclisa Rêveber a Rêveberiya Xweser a Bakur û Rojhilatê Sûriyê Bêrîvan Xalid û Ebid Hamid El-Mihbaş, cîgirên wan Hesen Koçer û Hemdan El-Ebid, hevserokê Daîreya Têkiliyên Karên Derve ya Rêveberiya Xweser a Bakur û Rojhilatê Sûriyê Ebdulkerîm Omer û nûnerên desteyên meclisên rêveber li dar ket.

Civîn bi rêzgirtinê dest pê kir, piştre rewşa siyasî hate nîqaşkirin. Hevserokê Daîreya Têkiliyên Derve Ebdulkerîm Omer îşaret bi girîngiya serdanên şandeyên herêmî û navneteweyî yên ji herêmên Rêveberiya Xweser a Bakur û Rojhilatê Sûriyê re kir, her wiha geşedanên siyasî û ewlehî li herêmê, dosya DAIŞ`ê û girîngiya dadgehkirina wan û malbatên wan nirxand.

Omer got: "DYA`yê piştrast kir ku ew zextê li Rûsyayê dike ku li herêmê garantorekî sereke yê diyalogên di navbera hikumeta Şamê û Rêveberiya Xweser de ye, ji ber ku dagirkirina herêmên nû yan jî êrişên nû tê wateya koçberkirineke nû û gelê Bakur û Rojhilatê Sûriyê dê bi kareseteke mirovî re rû bi rû bimînin."

Piştre beşdaran raporên mehane yên projeyên 2021`ê xwendin, projeyên hîn di pratîkê de ne û yê hîn pêk nehatine û zehmetiyên hemû deste dikişînin nîqaş kirin.

Piştî xwendina raporan û nirxandina wan, Desteya Serokatiya Meclisa Rêveber îşaret bi girîngiya projeyên xizmetguzariyê û piştgiriya malbatên şehîdan kir. Her wiha bal kişand ser girîngiya vekirina dewreyên perwerdekirinê yê taybet bi kar û xebata îdarî ya Meclisa Rêveber a Rêveberiya Xweser û aktîvkirina nivîsgehên xebatê yê rêveberiyên sivîl û xweser.

Cîgirê hevserokatiya Meclisa Rêveber  Hesen Koçber îşaret bi girîngiya rewşa aborî ya herêmê, pirsgirêka debarê û xwe îdarekirinê kir.

Beşdaran di dawiyê de mekanîzmeya belavkirina madeya mazotê ya zivistanê û bidawîkirina wê di dema ku hatiye veqetandin û li gorî kartên malbatan nifûs were kontrolkirin, nîqaş kirin.

(eh)

ANHA