Dêrikiyan sersaxî ji malbata şehîd Nalîn Mûsa re xwest

Bi sedan şêniyên herêma Dêrikê, navçeyên Girkê Legê û Çilaxa berê xwe da navçeya Çilaxa û sersaxî ji malbata şervana YPJ`ê Nalîn Mûsa (Çekjîn Can Qamişlo) re xwest. Şehîd Nalîn Mûsa dema li Şedadê bi erka xwe ya leşkerî radibû, şehîd ketibû.

Di merasîmê de fermandara YPJ`ê Hawar Dêrik axivî û sersaxî ji malbata şehîd re xwest û soza şopandina rêya şehîdan da. Hawar Dêrik di dawiya axaftina xwe de anî ziman ku xaka Rojava, Bakur û Rojhilatê Sûriyê bi saya şehîdan hatiye rizgarkirin, bi armanca parastina azadî û rûmeta gelên herêmê tevahiya pêkhateyên Bakur û Rojhilatê Sûriyê tê koşiyan.

Paşê hevserokê Melisa Malbatên Şehîdan a herêma Cizîrê Hesen Ubêd axivî û banga yekitiyê kir. Hesen Ubêd wiha got: "Şehîdên me bi armanca nifşên pêşerojê azad û birûmet bijîn, canê xwe feda kir, lewma yên ku em gihandine vê îradeya azad, şehîd bi xwe ne."

Li aliyekî din bi navê Kongreya Star û meclisa bajarokê Abîra gelek axaftin hatin kirin û sersaxî ji malbata şehîd Nalîn Mûsa re xwestin û soza şopandina rêya şehîdan da.

Piştî axaftin bi dawî bûn, nasnameya şehîd hate xwendin û radestî malbatê hate kirin.

(eh)

ANHA