Li Şehbayê mizgefta Elî Bin Ebî Talib hate vekirin

Komîteya Oldaran û Buroya Têkiliyên MSD`ê ya kantonên Efrîn û Şehbayê îro mizgefta Elî Bin Ebî Talib vekir.

CIVAK Û JIYAN

2 adar, 2020 14:09

ŞEHBA

Ji ber şerê li herêmê rû da, çend salan mizgefta Elî Bin Talib hate girtin, ji ber vê yekê Komîteya Oldaran û Buroya Têkiliyên MSD`ê mizgeft sererast kir û îro vekir.

Bi beşdariya bi dehan meleyên mizgeftan, rûspiyên kantonên Şehba û Efrînê, endam û rêveberên Meclisên herêma Efrînê mizgeft hate vekirin.

Beşdaran nimêja nîvroj li mizgeftê kir û paşê çend meleyan ayetên Quranê xwendin.

Endamê Komîteya Oldarên kantonên Efrîn û Şehbayê Reşad Hebeş axivî û vekirina mizgeftê li misilmanan pîroz kir. Reşad bang li bawermendan kir, ku divê her kes serdana mizgeftan bike û rihê xwe paqij bikin.

Paşê komîteya oldaran merasîma olî li dar xist.

Li ser navê rûspiyên eşîrên kantonên Efrîn û Şehbayê Hecî Mistefa hêviya bidawîbûna aloziya Sûriyê û misogeriya aşitiyê kir.

Hecî wiha dawî li axaftina xwe anî: "Em dixwazin pîvanên îslamiyetê li nava şêniyên Sûriyê belav bibin, şênî hev û din qebûl bikin û şerê navxweyî bi dawî bikin."

Di dawiyê de beşdaran lava kirin.

(eh)

ANHA