'Fedakariyên şehîdan pêkhateyên herêmê li dijî dagirkeran kirin yek'

Bi sedan şêniyên Dêrikê, Girkê Legê, Çilaxa û Til Koçerê sersaxî ji malbatên 7 şehîdan re xwest ku di dem û cihên cuda yên herêmên Bakur û Rojhilatê Sûriyê de şehîd bûne.

NÛÇE

20 sibat, 2020 12:39

QAMIŞLO

Bi sedan şêniyên herêma Dêrikê û navçeyên wê berê xwe da bajarokê Mustafawiyê yê girêdayî navçeya Girkê Legê da ku sersaxiyê bidin malbatên Waêl Omer (Zinar Botan) û Salih Ibrahîm (Xebat Ibrahîm) ku di dema pêkanîna erkên xwe yên leşkerî li bajarê Hesekê şehîd bûbûn û 5 şehîdên Berxwedana Rûmetê ku nasnameyên wan nehatin zanîn û duh li Goristana Şehîd Xebat Dêrik hatibûn veşartin, bi bîr bînin.

Merasîmê bi deqeyeke rêzgirtinê dest pê kir. Piştre şervanê YPG`ê Waêl Caco wiha axivî: "Em sersaxiyê ji malbatên şehîdên xwe re dixwazin ku bi saya wan şehîdan gelên li Bakur û Rojhilatê Sûriyê bi aştiyane dijîn."

Yek ji rêveberên Kongreya Star Muna El-Nasir jî sersaxî ji malbatên şehîdan re xwest û tekez kir ku bi saya xwîn û fedakariyên şehîdan hemû pêkhateyên Bakur û Rojhilatê Sûriyê li dijî dagirkeriyê bûne yek.

Merasîma sersaxiyê bi silogan û dirûşmên dilsoziya bi şehîdan re bi dawî bû.

(cx)

ANHA