Li Til Hemîsê li dijî gefên Tirkiyê meşa girseyî

Îro bi hezaran şêniyên navçeya Til Hemîs a Qamişlo ya herêma Cizîrê, endamên meclisa navçeyê û saziyên wê, meclisên şaredariyan û rûspî li dijî gefên Tirkiyê daketin qadan.

Xwepêşandanê ji ber meclisa navçeyê dest pê kir û ber bi kolanên sereke ve meşiya. Xwepêşandêran alên Tevgera Ciwanên Şoreşger, QSD`ê û pankartên "Na ji hebûna Tirkiyê li ser xaka me re", "Na ji terorîst Erdogan re" û "Bi vîna jinên azad em ê dagirkeriyê hilweşînin" hilgirtin.

Xwepşandêran sloganên li dijî hewldanên dagirkirinaTirkiyê ji herêmên Bakur û Rojhilatê Sûriyê re berz kirin û gotin "Gelê Sûriyê yek e, na ji êrîşên Erdogan re."

Meş li Qada Şehîdan veguherî mîtîngê. Li ser navê gelê navçeya Til Hemîsê bavê şehîd Xalid axivî û gefên Tirkiyê yên li dijî Bakur û Rojhilatê Sûriyê şermezar kirin û got bi navê meclisa navçeya Til Hemîsê, saziyên navçeyê, rûspî û zarokan ew gefên Tirkiyê red dikin.

Mihemed Xilêwî wiha anî ziman: "Bi navê vî gelî em gefên Tirkiyê şermezar dikin, me li vê herêmê ne li dijî zagonên navdewletî û ne jî li dijî ewlehiya cîhanê şer kiriye. Tenê me ev herêm ji terorê rizgar kir da ku bi rûmet û azad bijîn, ev jî bi saya fikr û felsefeya rêber Ocalan e."

Xilêwî di dewama axaftina xwe tekez kir ku em parçekirina xaka Sûriyê red dikin, her wiha heke dewleta Tirk êrîşî xaka Bakur û Rojhilatê Sûriyê bike, dê ber bi helakê ve bibe.

Mihemed Xilêwî di dawiya axaftina xwe de bal kişand  ser kiryarên Tirkiyê yên li dijî Efrînê  got: “Me dît ku Tirkiyê li dijî Efrînê çi kir, ji guhartina dîmografiyê bigire heta qetilkirin û revandina gel. Divê gel baş van kiryaran nas bike û li dijî Tirkiyê yekdest be.”

Bi navê eşîra Şerabîn a li herêma Til Hemîsê Abdulxaliq Abdullah jî axivî û gefên dewleta Tirk şermezar kirin û got: “Dîroka Tirkiyê jixwe reş e, teror derbasî herêma wan kir, Sûriyê tar û mar kir. Tirkiye naxwaze gel bi vîna xwe bijîn, berevajî vê yekê dixwaze ajandeyên wê pêk bên û em jî li dijî vê yekê ne.”

(eh)

ANHA