Seydayê Tîrêj li Hesekê hate bibîranîn

Yekîtiya Rewşenbîran a şaxê Hesekê helbestvan Seydayê Tîrêj di salvegera wefata wî ya 17`emîn de bi bîr anî. Merasima bîranînê li Navenda Çand û Hunerê ya Xabûr a li taxa Miftî hat lidarxistin. Gelek şêniyên herêma Cizîrê beşdarî merasimê bûn.

Merasîm bi deqeyek rêzgirtinê destpê kir. Paşê bi navê hevserokatiya Yekîtiya Rewşenbîran a Herêma Cizîrê, endamê yekîtiyê Ebûd Mexso axivî. Mexso berhem û keda Seydayê Tirêj ji bo vejandina çand û helbesta Kurdî bi bîr xist û got: “Helbestvanê nemir, di helbestên xwe de êşên gelê Kurd vedigot.”

Paşê kurê Seydayê Tîrêj Cemal Tîrêj axivî û spasiya kesên ku bi vê çalakiyê rabûne kir û pêwîstiya parastina berhemên helbestvan, nivîskar û rewşenbîran tekez kir.

Piştî wê endamê Yekîtiya Rewşenbîran a Amûdê Riyad Dirêî kurtejiyana helbestvan Seydayê Tîrêj vegot.

Piştî bidawîbûna axaftinan sînevizyonek girêdayî jiyana nemir hate pêşandan û helbestvan Salih Heydo, Ferhad Merdê û Anahîta girêdayî nemir Seydayê Tîrêj helbest vegotin.

Di dawiyê de Yekîtiya Rewşenbîran helbestvan Ferîd Cizîrî yê ku ji ber rewşa tenduristiyê nikarî beşdarî merasimê bibe xelat kir û li şûna wî keça wî Xunav Mele Ibrahîm xelat wergirt.

Helbestvan Seydayê Tîrêj ku navê wî yê rastîn Mele Nayif Hiso ye, di sala 1923`yan de li gundê  Necmok ê girêdayî kantona Qamişlo ji dayîk bûye. Nemir di nav gelek herêm û bajarên Rojavayê Kurdistanê û Sûriyê de geriya ye û helbestên xwe vegotine. Seydayê Tîrêj di 23`yê Adara 2002`yan çû ser dilovaniya xwe. Tîrêj bi merasîmeke girseyî li gundê Ker Keftar hate veşartin.

(şx)

ANHA