Li Reqayê kanalên avê tên restorekirin

REQA

Piştî ku çeteyên DAIŞ’ê bajarê Reqayê dagir kir, hemû alavên cihên giştî û cihên xizmetguzariyê rûxandin. Cihên avê û avdanê jî para xwe ji rûxandina çeteyan girt. Ji aliyekî din ve çeteyan bi sedan mayin di nava zeviyên gel de çandin. Bi rizgarkirina bajêr re meclis û saziyên xizmetguzariyê yên girêdayî Meclisa Sivîl a Reqayê ji bo restorekirina binesaziya bajêr dixebitin.

Di vî warî de Komîteya Çandiniyê ya El-Himêrat dest bi sererastkirina kanalên avdanê yên sereke û şaxî kirin. Komîte hewl dide xebatên xwe li ser du qonaxan bi rê ve bibe. Di qonaxa yekemîn de wê rêyên nêzî kanalan paqij bike û piştre di qonaxa duyemîn de dê ax û gemarê ji kanalan rake.

Dirêjahiya kanala ku dê were restorekirin 10 km ye. Ji El-Raêd dest pê dike heya zeviyên El-Himêrat û derdora 20 hezar donim erd av dide.

Serokê Komîteya Çandiniyê ya Meclisa Gel a El-Himêrat El-Xerbî Abdullah El-Hemadê destnîşan kir ku kanal ji ber dagirkeriyê telef bûbû û wiha got: “Em niha xebatên sererastkirinê dimeşînin da ku di mewsima niha de anku di mehekê de amade bikin.”

Ji destpêka rizgarkirina bajarê Reqayê û gundewarên wê ve Meclisa Sivîl a Reqayê û meclisên herêmî yên gund û bajarokan bê navber dixebitin. Bi van xebatan hewl didin xizmeta gel bikin û binesaziya herêmê sererast bikin.

(şx/bm)

ANHA