Li Kobanê nasnameya şehîdekî Berxwedana Serdemê hate eşkerekirin

KOBANÊ

Meclisa Malbatên Şehîdan a Kantona Kobanê îro bi merasîmekê nasnemeya şervanê YPG`ê Mihemed Osman Şêxo (Kawa Welat) ku di qonaxa yekemîn a Berxwedana Serdemê de li Efrînê şehîd bûbû, eşkere kir û sersaxî ji malbata şehîd re xwest.

Merasîm li bajarokê  Şêxler ê girêdayê navçeya Qinê ya kantona Kobanê bi tevlêbûna bi dehan şêniyên kantona Kobanê, endam û rêveberên saziyên sivîl hate lidarxistin. Merasîmê bi deqeyeke rêzgirtinê ji bo bîranîna şehîdan dest pê kir.

Endamê Partiya Yekitiya Demokratîk (PYD) a navçeya Qinê Ebdo Şêxo axivî û sersaxî ji malbata şehîdan re xwest û destnîşan kir ku Kawa Welat di berxwedana dîrokî ya li hemberî  dagirkeriya Tirk de şer kir û şehîd bû.

Her wiha li ser navê malbata şehîd Kawa Welat, Birêvan Amara axivî û soza şopandina rêya şehîdan nû kir û wiha got: "Şehîd Kawa canê xwe da ji bo ku em bi rûmet li ser vê axê bijîn, em jî wek malbata şehîd, soz didin em ê rêya azadiyê bişopînin.”

Piştî axaftinê, wesîqeta şehadetê hate xwendin û radestî malbata şehîd hate kirin.

(hk)

ANHA